Lífið

Aprílspá Siggu Kling – Nautið: Hafðu áhuga á fólkinu í kringum þig

Elsku skemmtilega Nautið mitt, vorið og sumarið er svo sannarlega þinn tími, svo þú skalt nýta hverja mínútu til að gleðjast og þakka fyrir það sem þú hefur. Þú ert að sjálfsögðu tilfinningaríkasta merkið, en það er algerlega á þínu valdi hvort þú lætur tilfinningarnar buga þig.

Guðrún Veiga er svo sannarlega guðs blessuð nautsorka sem gleður okkur sem horfum á snappið hennar. Það er alveg sama hvað verður á vegi hennar, hún getur gert grín að því. Og ef þú hefur húmor, elskan mín, þá muntu komast úr þinni krísu, hver svo sem hún er. Þú hefur svo dásamlega góð áhrif á umhverfi þitt og hefur áunnið þér marga aðdáendur, en þegar neikvæðnin heilsar þér byrjarðu að baula, og það sem slíkt skerandi baul getur hrætt alla í burtu. Þú skalt hafa það að leiðarljósi að hafa áhuga á fólkinu í kringum þig, sýna stuðning því þú ert styrkur svo margra.

Það kemur fyrir af því að þú ert svo tilfinningaríkt merki að þú getur misst mátt þinn um stund, þá skaltu tala þig til og tala þig upp, því að þú hlustar sterkast á þína rödd, og þess vegna er svo mikilvægt að þú sjáir að þú þarft að vera besti vinur þinn. Það býr mikill spámaður í þér, það er gott fyrir þig að spyrja alheiminn einhverrar spurningar upphátt upphátt, og það er fyrsta hugsun sem gildir og ef þeirri hugsun fylgir mikill kvíði, þá þýðir hún NEI. Þú þarft að læra að fara eftir því sem sálin segir við þig.

Það hefur verið staðfest af prófdómurum að fyrsta svarið sem þú finnur á þér í prófi er 99% öruggt að er það rétta. Þegar heilinn fer að rugla í þér og gefa þér nýja og nýja möguleika, þá er svarið yfirleitt vitlaust. Svo farðu að skoða, elsku fallega sál, að þú hefur svo miklar gáfur og átt eftir að sjá að þú hefur vængi og getur virkilega flogið. Hápunktur ársins hjá þér er apríl, maí og júní, þessi tími gefur tóninn fyrir allt árið, sérstaklega í sambandi við ástina.

Mottó – Þú ert mátturinn og dýrðin

Fræg Naut: Aron Einar Gunnarsson fyrirliði íslenska knattspyrnulandsliðsins, Hannes Þór Halldórsson markvörður, Ari Freyr Skúlason landsliðsmaður, Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj-snillingur.



Fleiri fréttir

Sjá meira