Innlent

Fjórir handteknir fyrir fíkniefnaframleiðslu í Kópavogi

Sunna Kristín Hilmarsdóttir skrifar
Það var í ýmsu að snúast hjá lögreglunni í gær og í nótt.
Það var í ýmsu að snúast hjá lögreglunni í gær og í nótt. vísir/Ernir

Klukkan rétt rúmlega 22 í gærkvöldi handtók lögreglan fjóra menn vegna gruns um að hafa staðið að fíkniefnaframleiðslu (ræktun) í Kópavogi. Var framleiðslan stöðvuð og mennirnir vistaðir í fangageymslu fyrir rannsókn málsins að því er fram kemur í dagbók lögreglu.

Skömmu áður hafði lögreglan handtekið þrjá unga menn á lokuðu athafnasvæði Eimskipa við Sundahöfn. Mennirnir eru kærðir fyrir húsbrot og voru vistaðir í fangageymslu vegna rannsóknar málsins.

Þá var tilkynnt um þjófnað úr verslun við Lækjargötu laust eftir klukkan 20 í gærkvöldi. Maður stal tveimur dýrum úlpum og var handtekinn skömmu síðar með þýfið. Hann er einnig grunaður um vörslu fíkniefna og var vistaður í fangageymslu.

Rétt fyrir klukkan hálfsex í gær voru svo fimm ölvaðir ungir menn handteknir við Kleppsveg. Þeir eru grunaðir um að hafa stolið bíl, eignaspjöll og ölvun við akstur. Þeir voru vistaðir í fangageymslu fyrir rannsókn málsins.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira