Féll af vélsleða og slasaðist

Björgunarsveit Slysavarnafélagsins Landsbjargar á Húsavík var kölluð út eftir hádegi í dag vegna vélsleðamanns sem féll af sleða sínum og slasaðist ofan Höskuldsvatns á Reykjaheiði.

Þetta kemur fram í tilkynningu frá Landsbjörg.

„Björgunarsveitamenn hlúðu að vélsleðamanninum á slysstað og bjuggu síðan um hann í snjótroðara frá skíðasvæði Húsvíkinga sem fenginn var á vettvang.

Snjótroðarinn ók með þann slasaða til móts við sjúkrabíl sem flutti hann á sjúkrahús,“ segir í tilkynningunni.