Erlent

Þýskir sósíaldemókratar komnir á flug með nýjan leiðtoga

Guðsteinn Bjarnason skrifar
Martin Schulz, nýr leiðtogi SPD, ásamt Sigmar Gabriel, sem nú hefur vikið úr leiðtogasætinu.
Martin Schulz, nýr leiðtogi SPD, ásamt Sigmar Gabriel, sem nú hefur vikið úr leiðtogasætinu. vísir/epa
Á sunnudaginn völdu þýskir Sósíaldemókratar sér nýjan leiðtoga í staðinn fyrir Sigmar Gabriel. Martin Schulz, sem var forseti Evrópuþingsins frá 2012 þar til nú í janúar, hlaut hundrað prósent atkvæða á flokksþinginu í Berlín.

Þetta er í fyrsta sinn frá lokum fyrri heimsstyrjaldarinnar að leiðtogi Sósíaldemókrataflokksins, SPD, er kosinn með stuðningi allra fulltrúa á flokksþingi.

Schulz tók ákvörðun um það í nóvember að söðla um í pólitíkinni, hætta á Evrópuþinginu en bjóða sig í staðinn fram sem kanslaraefni Sósíaldemókrata fyrir þingkosningarnar, sem haldnar verða í haust.

Fylgi flokksins hefur tekið stökk í skoðanakönnunum eftir að flokkurinn féllst á að hann yrði kanslaraefni, en það gerðist í lok janúar.

Flokkurinn er núna, nokkrum vikum síðar, kominn með um 35 prósenta fylgi, nokkurn veginn nákvæmlega jafn mikið og CDU, flokkur kristilegra demókrata, undir stjórn Angelu Merkel kanslara, en flokkarnir tveir hafa setið saman í ríkisstjórn undir forystu hennar síðan 2013.

Fyrir tveimur árum mældist CDU með yfir 40 prósenta fylgi en SPD hékk í 25 prósentum. Eftir að flóttafólk tók að flykkjast til Þýskalands árið 2015 dalaði fylgi beggja flokkanna mikið, en Schulz hefur náð að snúa þeirri þróun við fyrir SPD. Merkel hefur hins vegar ekki náð að styrkja stöðu síns flokks.

„SPD er kominn aftur. Við erum komnir til baka,“ sagði Schulz á flokksþinginu og boðar aukna áherslu á velferðarmál: „Ef við tryggjum ekki að hlutirnir séu félagslega sanngjarnir, þá mun enginn gera það,“ sagði hann.

Jafnhliða uppgangi SPD hefur AfD, þjóðernisflokkur þeirra sem helst óttast útlendinga, dalað í fylgi og er kominn niður fyrir 10 prósent eftir að hafa mjakast upp undir fimmtán prósenta fylgi meðan flóttamannastraumurinn var hvað mestur. 

Fréttin birtist fyrst í Fréttablaðinu.




Fleiri fréttir

Sjá meira


×