Innlent

Stríðsástand við Jökulsárlón

Jakob Bjarnar skrifar
Ásgeir Long kom að ferðamönnum í öngum sínum við Jökulsárlón en rúður um 40 bíla höfðu splundrast í sterkum vindhviðum sem léku bílana grátt.
Ásgeir Long kom að ferðamönnum í öngum sínum við Jökulsárlón en rúður um 40 bíla höfðu splundrast í sterkum vindhviðum sem léku bílana grátt. mynd/ásgeir Long
Neyðarástand ríkti við Jökulsárlón nú í dag en svo öflugar voru vindhviður þar að rúður bíla brotnuðu.

Ásgeir Ingi Jóhannesson Long leiðsögumaður segir að náttúran hafi heldur betur gefið ferðalöngum dagsins gott kjaftshögg. „Um 40 bílar misstu rúður í öflugum vindhviðum.“

Ásgeir greinir frá þessu á Facebooksíðu sinni nú fyrir skemmstu og birtir myndir af bílum þar sem sjá má að rúðurnar hafa bókstaflega splundrast. Sjálfur slapp hann við þessi ósköp en segir að þegar hann kom þar að hafi ríkt hálfgert stríðsástand.

Vísir hafði samband við Veðurstofuna sem sagði að á Kvískerjum hafi fóru hviðurnar uppí 40 metra á sekúndu. Meðalvindurinn var í kringum 20 en svo datt það niður eftir hádegi. Verst var veðrið í kringum 11 leytið, það rauk upp þá.

Veðurfræðingurinn sem fyrir svörum var sagðist ekki geta svarað fyrir það hvort slíkur vindhraði færi með rúður í stórum stíl, það gæti vel orðið ef möl eða grjót fer að fjúka upp. Þetta sé vindasamur staður. Ekki var eins hvasst á öðrum stöðum þarna fyrir austan, hvergi nærri því. En, þetta er vetrarveður. Það var slæmt á Vesturlandi í gær. Þar fóru vindhviður uppí 50 metra.

Á morgun er gert ráð fyrir slæmu veðri, hviðóttu og leiðinlegu og gengur á með éljum. Rigningaveður verður í nótt á Suður- og Vesturlandi sem svo færist yfir landð. Meðalvindur verður 15 til 23 metrar, sem telst hefðbundinn stormur. En, vindhviðurnar gætu vel farið uppí eitthvað svipað eða 40 metra á sekúndu.




Fleiri fréttir

Sjá meira


×