Innlent

Kostnaður psoriasis og exemsjúklinga mun margfaldast

Erla Björg Gunnarsdóttir skrifar

Ný reglugerð um greiðsluþátttöku Sjúkratrygginga Íslands í heilbrigðisþjónustu sem tekur gildi í maí felur í sér lægri niðurgreiðslu á heilbrigðisþjónustu en í staðinn er greiðsluþak.

Það þýðir að almennur notandi borgar hærra verð fyrir þjónustuna en að hámarki tæpar sjötíu þúsund krónur á ári. Öryrkjar og aldraðir og börn hafa lægra greiðsluþak.

Anja Ísabella Lövenholdt hjá Samtökum Psorisasis og exemsjúklinga bendir á að ljósameðferð fyrir þeirra skjólstæðinga verði margfalt dýrari við breytinguna.

„Þetta er verulegur aukakostnaður. Þar sem ríkið hafði áður niðurgreitt 80 prósent en núna þarf sjúklingur sjálfur að borga 90 prósent af heildargjaldinu.“

Að meðaltali þarf sjúklingur að fara tvisvar á ári í ljósameðferð og þá í þrjátíu skipti á stuttum tíma. Alls sextíu skipti á ári. Hingað til hefur meðferðin verið gjaldfrjáls en í mesta lagi rukkað komugjald upp á 265 krónur. Við breytinguna mun hver ljósatími kosta sjúklinginn að meðaltali tvö þúsund krónur.

Kostnaðurinn fer því úr 15.900 krónum á ári upp í tæpar sjötíu þúsund krónur - sem er greiðsluþak sjúkratrygginga. Fyrir utan þetta þurfa psoriasis- og exemsjúklingar að borga dýr lyf og kremmeðferðir úr eigin vasa.

„Það safnast þegar saman kemur - ef þú ætlar að ná árangri þá snýst það ekki um 2000 kallinn. Heldur snýst þetta um 2000 kallinn í þrjátíu skipti, tvisvar sinnum á ári, alltaf," segir Anja en sjúkdómarnir eru krónískir og því þurfa flestir að stunda þessa meðferð allt lífið.

Anja segir mikilvægt að fólk leiti sér meðferðar, bæði til að halda sjúkdómnum sjálfum í skefjum en einnig algengum fylgikvillum eins og liðagigt og andlegum sjúkdómum, en 20-40 prósent psoriasis sjúklinga þjást af þunglyndi og kvíða.

„Þetta mun hafa veruleg árhif á marga þjóðfélagshópa og þar á meðal ungt fólk. Við erum hrædd um að það muni hreinlega hætta að sækja sér meðferð."



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira