Innlent

Gefa ekki upp áætlað tap á landvinnslu HB Granda

Svavar Hávarðsson skrifar
Þrátt fyrir mikinn uppgang HB Granda að undanförnu þarf fyrirtækið að skera niður. Starfsmenn búa við óvissu um framhaldið. Starfsmaður landvinnslunnar gekk hægum skrefum upp tröppur HB Granda í gær.
Þrátt fyrir mikinn uppgang HB Granda að undanförnu þarf fyrirtækið að skera niður. Starfsmenn búa við óvissu um framhaldið. Starfsmaður landvinnslunnar gekk hægum skrefum upp tröppur HB Granda í gær. vísir/Anton
Ekki fæst gefið upp hversu mikið tap HB Grandi áætlar að verði af landvinnslu félagsins á Akranesi næstu misserin að óbreyttu.

„Við getum ekki fjallað um það sérstaklega. Fyrirtækið er á markaði og við getum ekki verið að tína einstakar tölur út úr rekstrinum,“ segir Vilhjálmur Vilhjálmsson, forstjóri HB Granda, spurður um útreikninga fyrirtækisins um afkomu landvinnslu á Akranesi.

Eins og fram hefur komið taka forsvarsmenn HB Granda ákvörðun í dag um hvort landvinnslu botnfisks á Akranesi verði hætt. Það þýðir að 93 störf í landvinnslu tapast, auk afleiddra starfa í bænum. Má fastlega gera ráð fyrir að þessi breyting á rekstri fyrirtækisins muni snerta upp undir 150 manns á Akranesi.

Vilhjálmur Vilhjálmsson
Íslensk sjávarútvegsfyrirtæki eru að koma út úr fordæmalausu góðæri. HB Grandi hefur skilað tugmilljarða króna hagnaði á undanförnum árum og voru arðgreiðslur í fyrra um þrír milljarðar króna, en stjórn félagsins leggur til að arðgreiðslur nemi 1,8 milljörðum fyrir árið 2016.

En kemur ekki til greina að fyrirtækið taki höggið í einhvern tíma í ljósi þessarar góðu afkomu svo þessi mikli fjöldi fólks fái haldið atvinnu sinni?

„Það er einfaldlega þessi staða til framtíðar sem við erum að meta núna. Það sem við höfum verið að horfa á er hvort það séu einhverjir möguleikar á því að rekstrarskilyrði fari batnandi. Við erum ekki að sjá það. Við sjáum ekkert slíkt í stöðunni og ég lít svo á að við séum í nauðvörn við að halda vinnslunni í landinu,“ segir Vilhjálmur.

Spurður hvort virkilega sé raunhæfur möguleiki á því að vinnsla sjávarfangs fari úr landi, segir Vilhjálmur svo vera. Hún sé erlendis að litlum hluta í dag. „En ég er ekki í nokkrum vafa um það að ef gengi íslensku krónunnar helst svo sterkt sem raun ber vitni, eða styrkist frekar til nokkurra ára, þá mun það draga verulega úr vinnslu hér á landi.“ 

Spurður hvað gæti breytt þeirri mynd sem hefur verið dregin upp fyrir Skagamenn, og verður tilkynnt í dag að óbreyttu, segist Vilhjálmur ekki sjá það í fljótu bragði. „Ef ég hefði lausn til að breyta þessu þá hefði ég þegar lagt hana á borðið,“ segir Vilhjálmur.

Þegar spurt er hvort krafan um að leggja niður landvinnslu á Akranesi hafi komið beint frá stjórn fyrirtækisins, svarar Vilhjálmur:

„Það er mikið verið að tala um samfélagslega ábyrgð okkar. Hún snýst að stórum hluta um það að standa að rekstri sem ber sig. Það er samfélagslega óábyrgt að standa að rekstri til lengri tíma sem ber sig ekki,“ segir Vilhjálmur en þráspurður um hagnað fyrirtækisins á undanförnum árum í því samhengi bætir hann við:

„Við höfum nýtt hann til mikilla fjárfestinga. Við erum til dæmis að byggja upp flota félagsins og tryggja reksturinn til framtíðar.“ Hann bætir við að stór hluti af hagnaði HB Granda skýrist af góðri afkomu af uppsjávarveiðum og vinnslu félagsins. 

Fréttin birtist fyrst í Fréttablaðinu.




Fleiri fréttir

Sjá meira


×