Glamour

Stolið af tískupallinum í París?

Ritstjórn skrifar
Glamour/Getty/AndriMarínó
Það fór vafalaust ekki framhjá neinum að úrslitakvöld Söngvakeppni Sjónvarpsins fór fram í gær og var mikið um dýrðir að venju en Svala Björgvinsdóttir og lagið Paper verða framlag Ísland í Kænugarði í vor. 

Það sem hefur vakið athygli er klæðaburður sjónvarpskonunnar Ragnhildar Steinunnar sem var kynnir í gærkvöldi, og stóð sig mjög vel í því hlutverki. Samfestingurinn sem hún klæddist var þó kunnuglegur enda sást hann síðast á fyrirsætunni Gigi Hadid á tískupallinum í París í haust fyrir franska tískuhúsið Balmain þar sem yfirhönnuðurinn Olivier Rousteing ræður ríkjum. 

Samfestingurinn sem Ragnhildur Steinunn klæddist var þó örlítið rauðari og beltið í öðrum stíl, og því ekki um hinn eina sanna Balmain samfesting að ræða.   

Hvað segja lesendur, hönnunarstuldur eða einungis innblástur frá pöllunum í París? Hvað ætli Rousteing finnist um málið?

Meira um málið má lesa í Fréttablaðinu í fyrramálið.

Af pöllunum í París í haust en samfestingurinn er úr vor-og sumarlínu Balmain.
Ragnhildur Steinunn í Laugardalshöll í gærkvöldi. mynd/Andri Marínó





×