Viðskipti innlent

Sala bifreiða tvöfaldast frá því á síðasta ári

Salan á Land Cruiser jeppum er að nálgast það sem hún var á árinu 2007.
Salan á Land Cruiser jeppum er að nálgast það sem hún var á árinu 2007. vísir/eyþór

Sala á dýrum bifreiðum hefur tekið kipp eftir hrun. Til að mynda hafa nýjar Toyota Land Cruiser-bifreiðar selst mun betur á síðustu tveimur árum en á árunum eftir hrun og fer salan nú að nálgast það sem var fyrir hrun. Páll Þorsteinsson, upplýsingafulltrúi Toyota, segir einstaklinga kaupa fleiri bíla en áður og hlutfall bílaleiga sé að minnka.

Runólfur Ólafsson, framkvæmdastjóri FÍB. Vísir/Auðunn

Rúmlega 21.000 fólksbílar voru fluttir hingað til lands á síðasta ári og áætla umboðsaðilar bifreiða hér á landi að sú tala verði slegin fljótt á þessu ári. Til samanburðar voru rúmlega 10.000 bifreiðar fluttar hingað til lands árið 2014. Því hefur bílasala tekið stakkaskiptum síðustu misseri.

Runólfur Ólafsson, framkvæmdastjóri FÍB, segir jákvæð teikn á lofti hvað varðar endurnýjun bílaflotans. Eftir hrun hafi sala nýrra bíla hrunið og endurnýjun stöðvast. „Nýjum bílum fylgir meira öryggi og minni eldsneytisnotkun, það eru þættir sem við þurfum að horfa til,“ segir Runólfur. „Við glötuðum nokkrum árum og sveiflurnar gera það að verkum að endurnýjun er ekki jöfn sem er æskilegast. Því er ánægjulegt að bílasala sé að taka við sér.

Í janúarmánuði eru fæstar bifreiðar fluttar inn hér á landi. Til að mynda voru 595 slíkar fluttar inn í janúarmánuði fyrir tveimur árum. Nú er öldin hins vegar önnur, en í janúar á þessu ári komu rúmlega 1.300 bifreiðar til landsins.

„Síðustu ár hafa bílaleigur drifið áfram sölu nýrra bíla hér á landi. Þær eru vissulega að kaupa marga bíla en við erum að sjá fleiri og fleiri einstaklinga fjárfesta í nýjum bílum,“ segir Páll. „Sala á nýrri bílum hefur verið með ágætum á síðustu mánuðum í takt við aukna hagsæld Íslendinga.“

Á árinu 2016 mældist hagvöxtur 7,2 prósent og einkaneysla jókst um 6,9 prósent frá árinu áður. Árlegur vöxtur einkaneyslu hefur ekki mælst meiri frá árinu 2005.

Fréttin birtist fyrst í Fréttablaðinu.




Fleiri fréttir

Sjá meira