Fótbolti

Juventus vann aftur tíu menn hjá Porto | Sjáðu mörkin

Óskar Ófeigur Jónsson skrifar
Paulo Dybala fagnar marki sínu.
Paulo Dybala fagnar marki sínu. Vísir/Getty

Ítalska liðið Juventus tryggði sér sæti í átta liða úrslitum Meistaradeildarinnar í kvöld eftir 1-0 sigur í seinni leiknum á Porto en leikurinn í kvöld fór fram á Ítalíu.

Juventus vann þar með 3-0 samanlagt en ítalska liðið gerði bara það sem þurfti í kvöld og ekki mikið meira en það.

Porto spilaði manni færri í 112 mínútur í leikjunum tveimur því portúgalska liðið missti mann af velli með rautt spjald í fyrri hálfleik í báðum viðureignunum.



Porto var ekki í góðum málum eftir 2-0 tap á heimavelli í fyrri leiknum en veika vonin dó endanlega þegar þeir fengu dæmt á sig vítaspyrnu og misstu auk þess mann af velli rétt fyrir hálfleik.

Maxi Pereira varði þá á marklínu með hendi frá Gonzalo Higuain eftir Iker Casillas að hafði rétt áður varið frá Paulo Dybala.

Maxi Pereira fékk beint rautt spjald frá dómara leiksins og Paulo Dybala fór á punktinn og kom Juventus í 1-0.

Þetta reyndist eina mark leiksins en gestirnir frá Porto fengu nokkur tækifæri til að skora og setja smá spennu í leikinn en tókst ekki. Liðsmenn Juventus fóru því örugglega áfram.





Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira