Viðskipti innlent

Þurftu ekki að bíða eftir samþykki vegna sölu Ölgerðarinnar

Haraldur Guðmundsson skrifar
Kaupsamningur um 69 prósenta hlut í Ölgerðinni var undirritaður í október.
Kaupsamningur um 69 prósenta hlut í Ölgerðinni var undirritaður í október. Vísir/Anton Brink

Eigendur Ölgerðarinnar og hópur fjárfesta sem undirritaði kaupsamning um 69 prósenta hlut í fyrirtækinu í október biðu eftir samþykki Samkeppniseftirlitsins fyrir sölunni í rúma fjóra mánuði að óþörfu. Salan var ekki tilkynningarskyld og úrskurðaði stofnunin endanlega um það í byrjun mars.

Tilkynnt var um kaup framtakssjóðanna Akurs fjárfestinga og Horns III, sem eru að mestu í eigu lífeyrissjóða, og hóps einkafjárfesta á 69 prósenta hlut í Ölgerðinni um miðjan október. Eignarhaldsfélagið Þorgerður ehf., F-13 ehf. og Lind ehf. seldu þá hluti sína í fyrirtækinu og í fréttatilkynningu um viðskiptin kom fram að undirritaður kaupsamningur innihéldi fyrirvara um samþykki Samkeppniseftirlitsins.

Samkvæmt upplýsingum Markaðarins vildu hinir nýju hluthafar ganga úr skugga um það hvort kaupin væru tilkynningarskyld eða ekki. Starfsmenn Samkeppniseftirlitsins hafi aftur á móti svarað fyrirspurn þeirra skömmu eftir að samningurinn var undirritaður um að stofnunin teldi þau ekki tilkynningarskyld samkvæmt samrunareglum samkeppnislaga. Þeir hafi þá verið beðnir um að skoða málið betur og endanlegt svar stofnunarinnar borist í byrjun mars.

„Til álita kom að salan fæli í sér ný yfirráð sem tilkynna bæri Samkeppniseftirlitinu. Niðurstaðan var hins vegar sú að svo væri ekki,“ segir Páll Gunnar Pálsson, forstjóri Samkeppniseftirlitsins, í skriflegu svari við fyrirspurn Markaðarins.

Heimildir Markaðarins herma að salan á Ölgerðinni gangi því í gegn á næstu dögum. Í frétt blaðsins í byrjun mars kom fram að söluverð 69 prósenta hlutarins hefði numið um fimm milljörðum króna þegar ekki er tekið tillit til skulda fyrirtækisins og handbærs fjár. Kom það fram í dómsmáli sem einn eigenda Þorgerðar höfðaði eftir að Sýslumaðurinn á höfuðborgarsvæðinu hafnaði beiðni hans um lögbann á söluna.

Salan á 69 prósenta hlutnum var samþykkt þann 16. október 2016 og fréttatilkynning send daginn eftir. Þorgerður átti þar af 45 prósent en þeir Októ Einarsson, stjórnarformaður Ölgerðarinnar, og Andri Þór Guðmundsson, forstjóri fyrirtækisins, ákváðu á endanum að selja ekki 31 prósents eignarhlut OA eignarhaldsfélags í fyrirtækinu. Samkvæmt upplýsingum blaðsins er þess nú beðið að allir erlendir birgjar og samstarfsaðilar Ölgerðarinnar samþykki breytinguna á hluthafahópnum.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál. 




Fleiri fréttir

Sjá meira