Sport

Gunnar segir mál Khabib algjörlega fáránlegt

Eiríkur Stefán Ásgeirsson skrifar
Gunnar á vigtinni fyrir sinn síðasta bardaga.
Gunnar á vigtinni fyrir sinn síðasta bardaga. vísir/getty
Gunnar Nelson segir að uppákoman í tengslum við bardaga Khabib Nurmagomedov og Tony Ferguson á UFC 209 fyrr í mánuðinum, sem var svo aflýst, hafi verið fáránleg.

Rússinn Khabib náði ekki þyngd fyrir bardagann en nóttina fyrir vigtunina var hann fluttur á sjúkrahús. UFC sagði það hefði tengst því að hann hafi verið að létta sig fyrir bardagann.

Haraldur Nelson, faðir Gunnars, hefur margsinnis gagnrýnt öfgakenndar aðferðir margra bardagakappa sem hafa oft misst fjölda kílóa á aðeins örfáum dögum í aðdraganda bardaga.

Sjá einnig: Haraldur Nelson: Hvenær á að hætta þessu? Þegar að einhver deyr?

„Byrjar þetta aftur! Hvenær á að hætta þessum svakalega niðurskurðar kjaftæði? Þegar að einhver deyr?“ skrifaði Haraldur á Facebook-síðu sína við þetta tilefni.

Khabib hefur verið gagnrýndur fyrir að ná ekki þyngd fyrir síðasta bardaga.vísir/getty
Viðkæmt umræðuefni

Gunnar, sem berst gegn Alan Jouban á bardagakvöldi UFC í London á laugardag, var í viðali við írska fjölmiðla fyrr í vikunni og gagnrýndi þessa uppákomu harkalega.

„Mér fannst þetta algjörlega fáránlegt. Hann hefur verið að væla um að fá titilbardaga í langan tíma. Svo gerist það og ég veit ekki hvað gerist - kannski veiktist hann sem væri afar óheppilegt,“ sagði Gunnar við sportsjoe.ie.

„Þetta var bara svolítið skrýtið. Hann hafði verið að tala um titilbardaga í langan tíma. Og svo nær hann ekki einu sinni þyngd.“

Sjá einnig: Kjúklingur og símaviðtöl hjá Gunnari sem gengur vel með niðurskurðinn

Fulltrúi UFC sem fylgdist með viðtalinu virtist reyndar ekki áhugasamur um að þessi mál yrðu rædd þegar spurningin um Khabib var borin upp. En Gunnar vildi fá að svara henni.

„Þessi spurning, þar sem þú spurðir um Khabib. Mér er sama þó svo að ég tali um það, ef það er í lagi,“ sagði Gunnar í upphafi samtalsins.

Gunnar Nelson í símaviðtali í vikunni.mynd/mjölnir/Sóllilja baltasarsdóttir
Lyfjaeftirlitið miklu betra

Hann leiðir líkum að því að hert eftirlit UFC með ólöglegri lyfjanotkun hafi sitt að segja með að sífellt fleiri bardögum hafi verið aflýst vegna vandræðum í tengslum við niðurskurð fyrir bardagana.

„Kannski er það ástæðan og kannski eru menn ekki að byrja á niðurskurðinum nógu snemma. En nýju lyfjareglurnar eru miklu betri og kannski hafa einhverjir verið að taka einhvern óþverra til að ná þyngdinni niður og það sé nú erfiðara,“ sagði hann.

„Ég er ekki viss. Ég hef aldrei verið í harkalegum niðurskurði sjálfur og þekki því ekki þessi lyf og stera sem þessir gaurar hafa verið að taka. En kannski að það sé ástæðan fyrir öllu þessu.“

Hann átti að fá borgað

Gunnar gagnrýnir einnig UFC fyrir að Tony Ferguson hafi ekki fengið full laun fyrir bardagann, þó svo að honum hafi verið aflýst.

„Það er erfitt að segja. En hann ætti að fá eitthvað því hann var búinn að skila sínum undirbúningi. Hann mætti á vigtunina og bar klár í bardagann,“ sagði Gunnar.

„Kannski er eðlilegt að hann fái ekki sigurbónusinn enda vann hann ekki bardagann. En hann hefði átt að fá launin sín, það er enginn vafi á því. Hann mætti á staðinn og var tilbúinn.“

Ekki missa af neinu tengdu bardaga Gunnars Nelson og Alan Jouban. Vísir er í London og færir ykkur allar nýjustu fréttirnar af Gunnari og bardagakvöldinu í O2-höllinni á laugardaginn. Fylgdu okkur á Facebook, Twitter og Snapchat (sport365). Fáðu þér áskrift á 365.is.

MMA

Tengdar fréttir




Fleiri fréttir

Sjá meira


×