Viðskipti innlent

Hlutafé Emmessíss aukið og endurfjármögnun lokið

Haraldur Guðmundsson skrifar
Nýir eigendur Emmesíss vilja efla markaðssókn og auka vöruframboð.
Nýir eigendur Emmesíss vilja efla markaðssókn og auka vöruframboð. vísir/gva

Endurfjármögnun Emmessíss lauk nýverið en nýir eigendur fyrirtækisins hafa lagt því til um 70 milljónir króna síðan í ágúst í fyrra. Rekstur ísframleiðandans hefur verið þungur síðustu ár en framkvæmdastjórinn er bjartsýnn nú þegar sér fyrir endann á fjárhagslegri endurskipulagningu.

„Þetta var lokahnykkurinn í heildar­hlutafjáraukningu sem hófst í ágúst. Þegar við nýju eigendurnir komum inn var ákveðið að gera það í tveimur skrefum og við keyptum gamla eigandann út í leiðinni,“ segir Ragnar Birgisson, framkvæmdastjóri og einn eigenda Emmessíss.

Samkvæmt tilkynningu Emmessíss til fyrirtækjaskrár Ríkisskattstjóra, dagsettri 15. mars, var hlutafé þess aukið um rúmar 20 milljónir króna. Hópur fjárfesta undir forystu Einars Arnar Jónssonar, sem oft er kenndur við Nóatún, eignaðist 90 prósenta hlut í fyrirtækinu í ágúst. Meðlimir hans lögðu þá Emmessís til nýtt hlutafé upp á 50 milljónir króna en fyrirtækið var áður í eigu Sparisjóðabankans (SPB), síðar einkahlutafélagsins SPB, og Eignarhaldsfélagsins Arev. Að sögn Ragnars hefur hópurinn nú einnig keypt síðustu tíu prósentin.

„Við höfum verið að endurskipuleggja reksturinn og þá bæði efnahagsreikning og rekstrarreikning. Við höfum aukið hlutafé og straum­línulagað framleiðsluna og fjárfest í bílum, tækjum og tólum. Hlutaféð var meðal annars notað í það og á ýmsum öðrum sviðum,“ segir Ragnar. Í tilkynningu um kaupin á Emmessís í október kom fram að nýir eigendur ætluðu sér að efla reksturinn með vöruþróun og frekari markaðssókn.
„Svo ætlum við að kynna ýmsar nýjungar núna í vor og þar standa upp úr tvær vörulínur. Við bindum miklar vonir við þær og til að koma þeim á markað höfum við þurft að fjárfesta í tækjum og búnaði.“

Eigendahópurinn samanstendur af Einari Erni, Þóri Erni Ólafssyni, fyrrverandi framkvæmdastjóra Sector viðskiptaráðgjafar, Gyðu Dan Johansen, fyrrverandi rekstrarfulltrúa 365 miðla, og Ragnari. Einkahlutafélagið Hnetutoppur, sem var stofnað í júlí í fyrra og er í eigu Einars, Þóris og Gyðu, greiddi 43 milljónir fyrir 77 prósenta hlut í Emmessís í hlutafjáraukningunni í ágúst.

Ísframleiðandinn var rekinn með 109 milljóna tapi árið 2015 samkvæmt nýjasta ársreikningi félagsins. Afkoman var neikvæð um 52 milljónir árið 2014 og ári síðar var bókfært eigið fé neikvætt um 150 milljónir. Eignarhaldsfélagið Arev og SPB, sem er að fullu í eigu Eignasafns Seðlabanka Íslands (ESÍ), áttu Emmessís í gegnum samlagshlutafélagið AREV N1. Félagið kom fyrst að rekstri fyrirtækisins árið 2007 þegar Auðhumla svf., móðurfélag Mjólkursamsölunnar (MS), seldi það. MS hafði þá rekið Emmessís frá árinu 1960. 

Fréttin birtist fyrst í Fréttablaðinu



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
HAGA
1,22
8
242.526
ICEAIR
0,66
11
85.648
MARL
0,29
12
438.347
ORIGO
0
1
497
TM
0
1
1.000

Mesta lækkun dagsins


Félag
Br.%
Fjöldi
Velta*
REGINN
-1,52
8
78.711
EIK
-1,42
5
129.885
REITIR
-1,11
8
236.805
SIMINN
-0,95
10
162.353
N1
-0,82
5
133.850