Golf

Frábær endir á góðum degi hjá Ólafíu í Phoenix

Óskar Ófeigur Jónsson skrifar
Ólafía Þórunn er hér að spila á LPGA-mótaröðinni.
Ólafía Þórunn er hér að spila á LPGA-mótaröðinni. vísir/getty

Ólafía Þórunn Kristinsdóttir kláraði fyrsta hringinn á Bank of Hope Founders meistaramótinu í golfi í Phoenix á þremur höggum undir pari.

Þetta er þriðja mótið hennar Ólafíu á LPGA-mótaröðinni og eins og hinum tveimur þá er okkar kona að byrja vel.

Ólafía Þórunn komst í gegnum niðurskurðinn á hinum tveimur mótunum og þessi fína spilamennska í dag er skref í að ná honum á þriðja mótinu í röð.

Ólafía spilaði þennan fyrsta hring af miklu öryggi og gerði mjög fá mistök. Hún missti kúluna reyndar í sandgryfju á einni holu á fyrstu níu en annars var hún að spila stöðugt og gott golf.

Ólafía Þórunn endaði síðan hringinn á því að ná fugli á síðustu holunni. Með því hoppaði hún upp um átta sæti.

Ólafía Þórunn fékk meðal annars einn örn á hringnum auk þess að vera með tvo fugla, fjórtán pör og einn skolla.

Þegar Ólafía lauk keppni þá var hún í sextánda sæti en þá áttu margar eftir að hefja leik þar sem Ólafía byrjaði að spila mjög snemma að staðartíma í Arizona.

Michelle Wie og Cheyenne Woods voru í ráshópnum með Ólafíu í dag. Michelle Wie spilaði mjög vel og endaði á sjö höggum undir pari. Cheyenne Woods fann sig ekki eins er og lék hringinn á þremur höggum yfir pari.

Hér fyrir neðan má hvernig hringurinn gekk hjá okkar konu í Phoenix í dag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira