Erlent

Kona særðist eftir að bréfasprengja sprakk á skrifstofu AGS

Atli Ísleifsson skrifar
Lögregla segir að um heimagerða sprengju hafi verið ræða.
Lögregla segir að um heimagerða sprengju hafi verið ræða. Vísir/AFP

Kona særðist eftir að bréfasprengja sprakk á skrifstofu Alþjóðagjaldeysissjóðsins (AGS) í París fyrr í dag. Forstjóri AGS hefur fordæmt árásina.

„Ég fordæmi þetta huglausa ofbeldisverk og ítreka að sjóðurinn er staðráðinn í að halda starfinu áfram í samræmi við umboð okkar,“ segir forstjórinn Christine Lagarde.

Franskir fjölmiðlar segja að starfsmaðurinn sem opnaði bréfið hafi særst í andliti og höndum, en lögregla skipaði í kjölfarið fjölda starfsmanna að yfirgefa bygginguna. Lögregla segir að um heimagerða sprengju hafi verið ræða.

François Hollande Frakklandsforseti segir árásina sýna að „við erum enn skotmark“. Ekki er ljóst hver ber ábyrgð á árásinni.

Grískur vinstri öfgahópur sagðist í gær bera ábyrgð á árásartilraun gegn þýska fjármálaráðuneytinu þar sem upp komst um bréf sem innihélt sprengiefni.

Bréfið barst ráðuneytinu degi áður en Wolfgang Schäuble, fjármálaráðherra Þýskalands, tók á móti bandarískum starfsbróður sínum, Steven Mnuchin.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira