Menning

Bransinn fjölmennti á frumsýningu Fórnar

Stefán Árni Pálsson skrifar
Ragnar Kjartansson var mættur á svæðið.
Ragnar Kjartansson var mættur á svæðið. Myndir/hanna

Listahátíðin Fórn, samstarfsverkefni Íslenska dansflokksins, LÓKAL og Borgarleikhússins, var frumsýnd í gærkvöldi. Um er að ræða glæsilega listahátíð sem kannar tengsl listsköpunar og trúar og tekist er með nýstárlegum hætti á við ritúalið í hversdagsleika lífs og listar. 

Viðburðurinn skartar alls fimm nýjum og spennandi verkum eftir frábæra og virta listamenn úr hinum ýmsu greinum. 

Í verkinu Ekkert á morgun (No Tomorrow) eftir Ragnar Kjartansson og Margréti Bjarnadóttur er hugmyndin um æskuna tekin fyrir af hópi dansara sem líða um sviðið með kassagítara, syngja og leika tónlist sem er sérstaklega samin fyrir Íslenska dansflokkinn af Bryce Dessner, tónskáldi og gítarleikara The National. 

Sameiningin (Union of the North) eftir bandaríska listamanninn Matthew Barney og þau Ernu Ómarsdóttur og Valdimar Jóhannsson er glæný kvikmynd og innsetning. Hópur fólks kemur saman í Kringlunni í þeim tilgangi að gæsa og steggja og öðlast um leið andlegan innblástur í musteri verslunarinnar.

Dias Irae eftir Gabríelu Friðriksdóttur er myrk og heillandi myndbands-innsetning sem dvelur við skilin milli lífs og dauða og umbreytingu mannskepnunnar. Myndin er einnig kveikja að dansverkinu Helgidómur (Shrine) eftir Ernu Ómarsdóttur og Valdimar Jóhannsson þar sem dansarar og aðrir sviðslistamenn veita innsýn í sköpunarferlið, eitthvað verður til úr engu og hið fánýta er hafið upp í trúarlega vídd.  

Hátíðahöldin ná síðan hápunkti sínum á Markaðnum sem tjaldað hefur verið til í forsal Borgarleikhússins og iðar af lífi og fjöri allan tímann. Þar kynna einstaklingar og félagasamtök skoðanir sínar, seldar verða veitingar og listafólk lætur til sín taka. 

Fórn er viðamesta uppfærsla í sögu Íslenska dansflokksins sem leggur nú undir sig öll leiksvið og forsal Borgarleikhússins. Þar flæða dans, myndlist, kvikmyndagerð, leiklist og tónlist saman í einn meginstraum, svo úr verður mögnuð upplifun.

Ljósmyndari 365 var á svæðinu á frumsýningunni í gær og fangaði stemninguna eins og sjá má hér að ofan.




Fleiri fréttir

Sjá meira