Íslenski boltinn

Grindvíkingar fullkomnuðu endurkomuna í uppbótartímanum

Óskar Ófeigur Jónsson skrifar
Grindvíkingar fagna marki síðasta sumar.
Grindvíkingar fagna marki síðasta sumar. Vísir/Hanna

Grindvíkingar fóru burtu með öll þrjú stigin frá Eimskipsvellinum í Laugardalnum í kvöld eftir að hafa unnið 3-2 endurkomusigur á heimamönnum í Þrótti í Lengjubikar karla í fótbolta.

Þróttarar voru 2-1 yfir þegar fimmtán mínútur voru eftir gestirnir úr Grindavík jöfnuðu metin á 77. mínútu og tryggðu sér síðan sigur í uppbótartíma.

Bandaríkjamaðurinn William Daniels skoraði sigurmarkið á fyrstu mínútu uppbótartímans eftir að Alexander Veigar Þórarinsson hafði jafnað metin í 2-2 á 77. mínútu.

Grindvíkingurinn Andri Rúnar Bjarnason skoraði fyrsta mark leiksins úr vítaspyrnu strax á fimmtu mínútu en jafnaði fyrir Þrótt aðeins sex mínútum síðar. Aron Dagur Heiðarsson kom Þrótti í 2-1 á 67. mínútu og þannig var staðan þar til endurkoma Grindvíkinga hófst þrettán mínútum fyrir leikslok.

Lærisveinar Óla Stefáns Flóventssonar hjá Grindvík hafa þar með náð í 10 stig af 12 mögulegum í fyrstu fjórum leikjum sínum og alls skorað í þeim 12 mörk eða þrjú mörk að meðaltali í leik. Þetta skilar liðinu í toppsæti 4 riðils á betri markatölu en Stjarnan.

William Daniels hefur skorað 4 mörk í fyrstu fjórum leikjum sínum í Lengjubikarnum í ár og Alexander Veigar Þórarinsson er með þrjú mörk.

Þróttur hefur tapað þremur af fjórum leikjum sínum og markatalan er sex mörk í mínus eða 6-12.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira