Viðskipti innlent

S&P hækkar lánshæfiseinkunn ríkissjóðs

Samúel Karl Ólason skrifar
Arnór Sighvatsson og Már Guðmundsson seðlabankastjórar.
Arnór Sighvatsson og Már Guðmundsson seðlabankastjórar. Vísir/Vilhelm
Matsfyrirtækið Standard & Poors tilkynnti nú í kvöld að lánshæfiseinkunn ríkissjóðs Íslands hefði verið hækkuð. Hún er nú A/A-1 og eru horfur sagðar vera stöðugar. Í yfirlýsingu fyrirtækisins, sem sjá má á vef Fjármálaráðuneytisins, segir að ástæða hækkunarinnar sé afnám fjármagnshafta og samningar við aflandskrónueigendur.

Fyrirtækið segir það hafa leitt til minni líkna á óhagstæðri greiðslujafnaðarþróun og það ætti að styrkja aðgengi innlendra aðila að erlendum fjármálamörkuðum. Þá segir í tilkynningunni að aðgerðirnar ættu að laða fleiri erlenda fjárfesta til landsins og bæta sveigjanleika peningastefnunnar.

Enn fremur segir að fjöldi ferðamanna hér á landi hafi gert Seðlabankanum kleift að byggja upp mikinn gjaldeyrisforða og það spili stóra rullu í að hægt hafi verið að grípa til aðgerða vegna haftanna.

S&P hefur einnig hækkað hagvaxtarspá sína varðandi Ísland úr þremur prósentum í 3,5 prósent. Líkt og í fyrra telur fyrirtækið að hann verði borinn uppi af vexti í ferðamennsku og innlendri eftirspurn. Hins vegar segir í tilkynningunni að möguleiki sé á ofhitnun í hagkerfinu.


Tengdar fréttir

Afnám hafta hafi jákvæð áhrif á lánshæfi ríkissjóðs

Matsfyrirtækið Moody‘s metur það sem svo að afnám fjármagnshafta hafi jákvæð áhrif á lánshæfi ríkissjóðs og fjármálageirans en þetta kemur fram í frétt fyrirtækisins frá því fyrr í dag og greint er frá á vef fjármálaráðuneytisins.






Fleiri fréttir

Sjá meira


×