Körfubolti

Höttur komst aftur upp í Domino´s deildina í kvöld

Óskar Ófeigur Jónsson skrifar
Mirko Stefán Virijevic fagnar úrvalsdeildarsætinu í kvöld.
Mirko Stefán Virijevic fagnar úrvalsdeildarsætinu í kvöld. Vísir/Hanna

Höttur frá Egilsstöðum tryggði sér í kvöld sæti í Domino´s deild karla á næsta tímabili eftir 32 stiga sigur á Ármanni, 99-67, í íþróttahúsi Kennaraháskólans.

Höttur á tvo leiki eftir en ekkert lið getur nú lengur náð þeim að stigum. Efsta liðið í 1. deild karla fer beint upp en liðin í 2. til 5. sæti spila um hitt sætið í úrslitakeppni.  Höttur stoppaði því bara eitt tímabil í 1. deildinni.

Hattarmenn hafa unnið 20 af 22 leikjum sínum í 1. deildinni í vetur en liðið hefur aðeins tapað einum heimaleik og einum útileik á öllu tímabilinu.

Ragnar Gerald Albertsson var stigahæstur hjá Hetti með 24 stig og Aaron Moss var með 15 stig, 8 fráköst og 6 stoðsendingar. Mirko Stefán Virijevic var með 13 stig.

Viðar Örn Hafsteinsson, þjálfari Hattar, er því búinn að koma liðinu upp í úrvalsdeildina í annað sinn á þremur árum. Hann spilaði með liðinu í vetur og var með 13 stig í sigrinum í kvöld

Höttur komst einnig upp vorið 2015 en féll aftur úr Domino´s deildinni fyrir ári síðan.

Þetta verður þriðja tímabil Hattar í úrvalsdeild karla en liðið lék einnig í efstu deild veturinn 2005-06.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira