Innlent

Talið er að pilturinn hafi orðið viðskila við vini sína sökum slæms veðurs

Birgir Olgeirsson skrifar
Lögregla í Höfðaborg útilokar saknæmt athæfi vegna dauða íslensks pilts í hlíðum Table-fjalls í Suður-Afríku.
Lögregla í Höfðaborg útilokar saknæmt athæfi vegna dauða íslensks pilts í hlíðum Table-fjalls í Suður-Afríku. Vísir/EPA
Talið er að íslenski pilturinn, sem fannst látinn í hlíðum Table-fjall við Höfðaborg í Suður-Afríku í gær, hafi látist af slysförum.

Þetta segir Ezra October, yfirvarðstjóri hjá lögreglunni í Höfðaborg, í samtali við Vísi.

Pilturinn var nítján ára gamall og kom til Höfðaborgar 12. janúar síðastliðinn.

October segir hann hafa verið á göngu ásamt vinum sínum við Table-fjall á laugardag. October segir lögreglu telja að pilturinn hafi orðið viðskila við hópinn sökum slæms veðurs, en hvöss suðaustanátt var á fjallinu um helgina. Þegar vinum hans varð ljóst að hann hafði ekki skilað sér niður fjallið gerðu þeir þjóðgarðsvörðum viðvart sem ræstu strax út leitarflokka.

Fjallgöngumaður fann lík piltsins í Platteklip-gilinu við Table-fjall í gærmorgun. October segir lögreglu telja að pilturinn hafi hlotið höfuðáverka eftir fall í hlíðum fjallsins.

Lögreglan í Höfðaborg er nú með málið til rannsóknar og bíður niðurstöðu krufningar. Lögregla útilokar að dauða piltsins hafi borið að með saknæmum hætti.

Ezra October segir vini piltsins hafa gert fjölskyldu hans viðvart vegna málsins.

Hann segir ekki hægt að greina frá nafni piltsins að svo stöddu.

Dauðsföll af slysförum eru ekki óalgeng á Table-fjalli, en á árunum 2001 til 2011 létust alls 79 manns á fjallinu.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×