Körfubolti

Butler og Wade frábærir í sigri á Cavaliers

Kristinn Páll Teitsson skrifar
Wade var einu frákasti frá þrefaldri tvennu í nótt.
Wade var einu frákasti frá þrefaldri tvennu í nótt. Vísir/Getty

Jimmy Butler og Dwyane Wade áttu báðir frábæra leiki í öruggum 117-99 sigri Chicago Bulls á LeBron James-lausum Cleveland Cavaliers mönnum í Cleveland í gær en Wade var aðeins einu frákasti frá því að vera með þrefalda tvennu eins og Butler.

LeBron gat ekki tekið þátt í leiknum vegna veikinda og saknaði Cleveland því tveggja stórstjarna í leiknum en Kevin Love er enn frá vegna meiðsla.

Jafnræði var með liðunum framan af og var Cleveland með eins stiga forskot í hálfleik en gestirnir frá Chicago komu mun sterkari inn í seinni hálfleikinn og náðu um tíma tuttugu stiga forskoti í öruggum sigri.

Butler var með þrefalda tvennu með 18 stig, tíu fráköst og tíu stoðsendingar en Wade var með 20 stig, níu fráköst og tíu stoðsendingar í leiknum.

Í liði Cleveland var það Kyrie Irving sem var atkvæðamestur í fjarveru James og Love með 34 stig ásamt því að taka níu fráköst og gefa sjö stoðsendingar.

Í Houston heldu heimamenn áfram að einfaldlega byggja á þeirri hugmyndafræði að skora meira en gestirnir en þrátt fyrir að fá á sig 130 stig á heimavelli unnu Rockets menn tólf stiga sigur á Minnesota Timberwolves 142-130.

Houston leiddi allt frá fyrstu mínútu og náði þegar mest var tuttugu stiga forskoti en tröllatvenna Karl-Anthony Towns með 37 stig og 22 fráköst hélt Úlfunum frá því að fá rassskellingu.

Í New York setti Carmelo Anthony niður sigurkörfuna þegar þrjú sekúndubrot voru eftir í sigri Knicks á Philadelphia 76ers.

Knicks léku án Kristaps Porziņģis í nótt og þurfti Carmelo því að taka meiri ábyrgð í sóknarleiknum. Var hann með 37 stig í leiknum og hitti úr 15/25 skotum sínum ásamt því að setja niður fimm af sjö vítaskotum sínum.

Þá töpuðu Pelíkanarnir frá New Orleans öðrum leik sínum í röð með vandræðagemsann DeMarcus Cousins innanborðs gegn Dallas Mavericks í nótt en Cousins hafði hægt um sig í leiknum með 12 stig og 15 fráköst.

Úrslit kvöldsins:
Sacramento Kings 85-99 Charlotte Hornets
Orlando Magic 105-86 Atlanta Hawks
New York Knicks 110-109 Philadelphia 76ers
Miami Heat 113-95 Indiana Pacers
Dallas Mavericks 96-83 New Orleans Pelicans
Cleveland Cavaliers 99-117 Chicago Bulls
Houston Rockets 142-130 Minnesota Timberwolves
Golden State Warriors 112-95 Brooklyn Nets

Bestu tilþrifin: Einvígi Harden og Towns í Houston: Anthony reyndist drjúgur á lokasprettinum:
NBA


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira