Veiði

Aðalfundur SVFR mótmælir áformum um sjókvíaeldi

Karl Lúðvíksson skrifar

Eins og áður hefur komið fram var aðalfundur Stangaveiðifélags Reykjavíkur haldinn 25. febrúar. Vel var mætt á fundinn í blíðskaparveðri í Elliðaárdalnum.

Fram fóru venjubundin aðalfundarstörf og gékk fundurinn vel fyrir sig. Mikil endurnýjun átti sér stað í stjórn félagsins en þau Ragnheiður Thorsteinsson, Hörður Vilberg og Ásmundur Helgason sóttust ekki eftir endurkjöri, en Stangaveiðifélag Reykjavíkur þakkar þeim fyrir vel unnin störf á undanförnum árum. Það voru því sex aðilar sem sóttust eftir kjöri til stjórnarsetu í þau þrjú sæti sem laus voru í stjórn félagsins. Það fór svo að Ágústa Katrín Guðmundsdóttir, Ólafur Br. Finnbogason og Jóhann Kristinn Jóhannesson hlutu kosningu. Árni Friðleifsson var einn í kjöri til formanns félagsins og var hann því sjálfkjörinn.

Nokkuð var um smávægilegar lagabreytingartillögur sem allar voru samþykktar, þær er hægt að kynna sér betur HÉR.

Ein ályktun kom til skjala og var hún frá stjórn félagsins sem ályktaði frekar um laxeldi og hljóðar hún svo:

„Aðalfundur SVFR 25. febrúar, 2017 ítrekar mótmæli sín gegn þeim áformum sem fram eru komin um viðamikið sjókvíaeldi við Íslandsstrendur. Rannsóknir og reynsla annarra þjóða sem stunda laxeldi í opnum sjókvíum er sú að smitsjúkdómar, sníkjudýr og sleppifiskar munu óhjákvæmilega skaða lífríki í ám og vötnum hér á landi. Víst er að óhjákvæmileg genablöndun eldislax og villtra laxastofna mun valda óbætanlegu tjóni. Enn er brotalöm í stjórnsýslunni varðandi leyfisveitingar, reglur um staðsetningu eldiskvía og eftirlit með starfsemi eldisstöðva. Því er þess er krafist að regluverki um fiskeldi verði komið í viðunandi horf og fram fari óháð áhættumat á þeim skaða sem fiskeldi er talið hafa í för með sér, svo og fullkomið mat á verndargildi fiska og fugla áður en frekari framkvæmdaleyfi verði gefin út.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira