Golf

Heiðarleiki Ólafíu kostaði hana víti

Eiríkur Stefán Ásgeirsson skrifar
Ólafía Þórunn Kristinsdóttir var hæstánægð með árangur sinn á ISPS Handa-mótinu í Ástralíu en hún hafnaði í 30.-39. sæti á mótinu eftir að hafa spilað á tveimur yfir pari vallarins í nótt. Hún lék hringina fjóra samtals á pari.

„Ég er mjög ánægð, sérstaklega eftir að hafa komist í gegnum niðurskurðinn sem var afar tæpt,“ sagði hún í samtali við Vísi í morgun en síðustu tvo keppnisdagana gerði mikill vindur keppendum erfitt fyrir.

„Hann var nokkuð sterkur, vindurinn, og óstöðugur. Hann breyttist oft fyrirvaralaust og þá er afar erfitt að reikna út höggin. Mér gekk mjög vel að slá af teig en þegar kom að því að slá inn á flatirnar var það stundum erfitt að reikna út höggin. Maður átti stundum mjög langt pútt eftir,“ sagði Ólafía.

Sjá einnig: Ólafía hafnaði í 30. sæti í Ástralíu

Eftir að hafa parað fyrstu þrjár holurnar kom ekki annað par fyrr en á tólftu holu. Þess á milli fékk hún þrjá fugla, þrjá skolla og einn skramba.

Skrambinn kom á sjöundu holu sem er par þrjú. Hún lenti í sandgryfju og þar fékk hún dæmt á sig víti.

„Bönkerinn var illa rakaður sem er afar óvenjulegt. Það var smá ójafna sem ég tók ekki eftir og og snerti ég sandinn í aftursveiflunni. Það má ekki,“ útskýrði hún.

Sjá einnig: Ólafía fékk tæpa milljón í sinn hlut

„En það sá þetta enginn nema ég. Ég gekk því upp að dómaranum og sagði frá þessu. Ég spilaði holuna á pari en heiðarleikinn kostaði mig tvö högg. En það var miklu betra að gera þetta svona enda er ég ekki þannig manneskja sem getur bara haldið áfram. Það hefði allt farið í rugl hjá mér.“

„Ég náði að koma sterk til baka og fékk fugla á næstu tveimur holum á eftir. Ég náði því að bæta fyrir þetta.“

Næstu tvö mót á LPGA-mótaröðinni fara fram í Asíu en Ólafía Þórunn fær ekki keppnisrétt á þeim. Næsta mót hennar verður í Phoenix í Bandaríkjunum um miðjan næsta mánuð.


Tengdar fréttir

Ólafía söng og dansaði eftir hringinn | Myndband

Gleðin var svo sannarlega við völd hjá okkar konu, Ólafíu Þórunni Kristinsdóttur, eftir að hún komst í gegnum niðurskurðinn á ISPS Handa-mótinu á LPGA-mótaröðinni í morgun.




Fleiri fréttir

Sjá meira


×