Veiði

Ein af veiðnustu flugunum í silung

Karl Lúðvíksson skrifar
Langskeggur
Langskeggur Mynd: www.arvik.is

Yfir veturinn sitja veiðimenn og hnýta fyrir komandi sumar og það eru alltaf einhverjar flugur sem eru vinsælli en aðrar.

Það kemur alltaf fram fluga reglulega sem verður skyldueign í boxinu og þá gildir einu hvort það er laxafluga eða silungsfluga.  Laxaflugurnar sem hafa komið fram síðustu ár og náð því að verða vinsælar hjá veiðimönnum sem og verið veiðnar á sama tíma eru t.d. Metalica, Green Collie Bitch og Haugur svo aðeins fáar séu nefndar.  Silungsflugur sem slá svona í gegn koma ekki oft fram en þegar þær gera það flýgur orðrómurinn hratt og fljótlega eru allir komnir með fluguna í boxið.

Flugan sem var á þröskuldi vinsælda í fyrra verður líklega spútnik flugan í silung þetta árið, það er í það minnsta okkar ágiskun.  Flugan er bæði veiðin og fjölhæf sem þýðir að hún er notuð til jafns í ám og vötnum.  Hún líkist lirfu bitmýs og þegar það er klak í gangi í vötnunum og lirfurnar á leiðinni uppá yfirborðið getur þessi fluga gefið vel, mjög vel.  Hún á nokkur hálfsystkin og má þar nefna Friscoinn hans Þórs Níelsen og Taylorinn hans Skarphéðins klæðskera en báðar þessar flugur líkja eftir bitmýslirfunni.  Eins og sést á meðfylgjandi mynd er þetta auðhnýtt fluga sem fer best á low water long shank öngul í stærðum 12-18#. Veiddu hana á langan taum, löturhægt en líka í litlum stuttum rykkjum í öðru hverju kasti.  



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira