Innlent

„Auðvitað er ég ekkert sérstaklega sáttur við að vera ekki ráðherra“

Birgir Olgeirsson skrifar
Brynjar hafði augastað á dómsmálaráðuneytinu.
Brynjar hafði augastað á dómsmálaráðuneytinu. Vísir/Anton Brink

Brynjar Níelsson, þingmaður Sjálfstæðisflokksins, studdi tillögu Bjarna Benediktssonar, formanns Sjálfstæðisflokksins, um ráðherraskipan í nýrri ríkisstjórn Sjálfstæðisflokks, Viðreisnar og Bjartrar framtíðar, en er ekki sáttur við sín hlutskipti.

„Auðvitað er ég ekkert sérstaklega sáttur við að vera ekki ráðherra. En þetta er niðurstaðan, maður er í pólitík til að reyna að hafa sem mest áhrif,“ segir Brynjar í samtali við Vísi.

Spurður hvort hann hafi haft augastað á einhverju sérstöku ráðuneyti segir hann það nokkuð augljóst.

„Auðvitað er nærtækast að ætla það sem þekking og reynsla hefði komið að gagni. Það segir sig eiginlega sjálft,“ segir Brynjar sem starfaði lengi sem lögmaður áður en hann varð þingmaður og hafði því augastað á dómsmálaráðherrastólnum.

Sigríður Á. Andersen er nýr dómsmálaráðherra. vísir/pjetur

„Það er bara svona, það er ágætis kona í þessu embætti,“ segir Brynjar og á þar við Sigríði Á. Andersen.

Leiðindi ekki í boði í eins manns meirihluta
Brynjar fór mikinn í Morgunútvarpi Rásar 2 síðastliðinn föstudag þar sem hann sagði að hann vildi horfa til niðurstöðu kosninga þegar kemur að ráðherraembættum. „Lýðræði er þannig að það var prófkjör og úr því varð ákveðin niðurstaða þar sem fólki var raðað upp. Það vill svo til að það eru fimm karlar og ein kona. Ég auðvitað bara horfi til þess að menn virði niðurstöður kosninga,“ sagði Brynjar í Morgunútvarpi Rásar 2.

Hann segir þessi sjónarmið hafi ekki orðið ofan á að þessu sinni en studdi engu að síður þessa ráðherraskipan, ólíkt þingflokksfélaga sínum Páli Magnússyni.

Sjá einnig: Páll studdi ekki ráðherraskipan: Lítilsvirðing gagnvart Suðurkjördæmi

„Það þýðir ekkert að vera með leiðindi þegar menn eru með eins manns meirihluta,“ segir Brynjar sem segir ekki ástæðu til annars en að vera bjartsýnn á gengi þessarar ríkisstjórnar.

„Þetta er auðvitað knappur meirihluti og gerir það erfiðara, en það getur líka verið styrkur í því,“ segir Brynjar.

Þórdís Kolbrún er yngsta konan frá upphafi til að gegna ráðherrastöðu hér á landi. Vísir/Vilhelm

„Gæti alveg slegið í gegn hún Þórdís mín“
Í Morgunútvarpinu síðastliðinn föstudag tjáði Brynjar líka þá skoðun sína að þeir sem yrðu gerðir að æðsta handhafa framkvæmdavaldsins yrðu að hafa ákveðna reynslu og þekkingu.

Sjá einnig: Brynjar ekki viss um að það myndi gera Áslaugu gott að verða ráðherra

Þórdís Kolbrún Reykfjörð Gylfadóttir, sem var í öðru sæti á lista Sjálfstæðisflokksins í Norðvesturkjördæmi, kom ný inn á þing síðastliðið haust og er nú orðin ráðherra ferðamála-, iðnaðar- og nýsköpunar 29 ára gömul og því yngsta konan frá upphafi til að gegna ráðherrastöðu hér á landi. Hún hafði áður verið aðstoðarmaður Ólafar Nordal, fráfarandi innanríkisráðherra, og þekkir því vel til ráðherrastarfa.

Brynjar hefur mikla trú á Þórdísi. „Mér lýst ágætlega á hana. Hún er mikil vinkona mín hún Þórdís og góð kona. Hún gæti alveg slegið í gegn hún Þórdís mín.“


Tengdar fréttir

Óttast ekki óvinsæla ráðuneytið

Óttarr Proppé segir það mikið styrkleikamerki að í stól heilbrigðisráðherra hafi sest formaður eins stjórnarflokkanna og sé það til marks um að ný ríkisstjórn leggi ríka áherslu á málaflokkinn.

Sjö nýir ráðherrar

Sjö þingmenn taka í fyrsta sinn við embætti ráðherra í nýrri ríkisstjórn Viðreisnar, Bjartrar framtíðar og Sjálfstæðisflokks. Alls verða ráðherrarnir ellefu. Sex úr röðum Sjálfstæðisflokks, þrír úr Viðreisn og tveir frá Bjartri framtíð.

Ráðherralisti Sjálfstæðisflokksins tilbúinn

Kristján Þór Júlíusson, Sigríður Á. Andersen, Jón Gunnarsson, Þórdís Kolbrún Reykfjörð Gylfadóttir, Bjarni Benediktsson, Guðlaugur Þór Þórðarson og Jón Gunnarsson eru ráðherrar Sjálfstæðisflokksins í nýrri ríkisstjórn.




Fleiri fréttir

Sjá meira