Innlent

Tóta á Kárastöðum lokar sjoppunni 28. des

Kolbeinn Tumi Daðason skrifar
"Enginn hefur haft neitt út á þennan rekstur að setja. Ég skil þetta ekki. Ég er mjög sár yfir þessu,“ sagði Tóta í viðtali við Vísi í október.
"Enginn hefur haft neitt út á þennan rekstur að setja. Ég skil þetta ekki. Ég er mjög sár yfir þessu,“ sagði Tóta í viðtali við Vísi í október. Vísir/GVA

Þóra Einarsdóttir á Kárastöðum við Þingvallavatn hefur rekið veitingasölu í Þjónustumiðstöðinni á Þingvöllum frá árinu 1986 en nú eru aðeins vika þar til sjoppunni verður lokað. Þóru, sem í sinni sveit Bláskógabyggð er kölluð Tóta og kennd við Kárastaði, var sagt upp leigusamningi en hún hefur leigt aðstöðu af ríkinu í Þjónustumiðstöðinni.

Linda Rós Helgadóttir, dóttir Tótu, greinir frá því í Baklandi Ferðaþjónustunnar á Facebook að síðasti opnunardagurinn verði 28. desember. Sjoppan verði lokuð síðustu þrjá daga ársins.

Linda Rós hefur stutt móður sína með ráðum og dáð og meðal annars skrifaði hún í fyrra bænaskjal til Þingvallanefndar og óskaði eftir framlengingu samningsins.

Þrír dagar í tiltekt
„Við eigum að skila henni af okkur um áramót og þurfum tíma til að ganga frá. Ég veit ekki hvenær þjóðgarðsstarfsmenn muni svo opna hana aftur,“ segir Linda Björk.

Ósk Tótu um framlengingu á leigusamningi var hafnað af Þingvallanefnd, sem hefur yfir starfseminni að segja. Þjónustumiðstöðin sem og landið innan þjóðgarðsins er í eigu ríkisins. Leita á til nýrra aðila varðandi rekstur sjoppu.

„Rekstraraðili sjoppunnar frá 1986, móðir mín, þakkar kærlega öll viðskipti og velvild síðustu 30 árin,“ segir Linda.

Fær enga aðra vinnu í sveitinni
Tóta var ekki par ánægð með ákvöðrun Þingvallanefndar að endurnýja ekki samninginn við sig.

„Enginn hefur haft neitt út á þennan rekstur að setja. Ég skil þetta ekki. Ég er mjög sár yfir þessu. Ég er orðin 61 árs, ég fæ ekki neina vinnu við eitt eða neitt hér í sveitinni. Ég hef skilað skatti til hreppsins – útsvari – en ríkið borgar ekki neitt til hreppsins.“

Rætt var ítarlega við þær mæðgur í október síðastliðnum en hlekkur á viðtalið er hér að neðan.


Tengdar fréttir




Fleiri fréttir

Sjá meira