Innlent

Jens neitar sök og farið fram á lokað þinghald

Birgir Olgeirsson og Kolbeinn Tumi Daðason skrifa
Jens Gunnarsson mætir í dómssal í morgun. Með honum á myndinni er Vilhjálmur Hans Vilhjálmsson, verjandi Péturs Axels.
Jens Gunnarsson mætir í dómssal í morgun. Með honum á myndinni er Vilhjálmur Hans Vilhjálmsson, verjandi Péturs Axels. Vísir/Ernir
Rannsóknarlögreglumaður sem sat í gæsluvarðhaldi í janúar síðastliðnum grunaður um brot í starfi og sætir ákæru fyrir spillingu, brot gegn þangarskyldu og brot í opinberu starfi neitaði sök þegar málið var þingfest í Héraðsdómi Reykjavíkur í morgun. Lögreglumanninum, Jens Gunnarsson, var vikið frá störfum þegar málið kom upp í lok árs 2015 og hefur verið frá störfum síðan.

Ákæra var gefin út í málinu fyrr í mánuðinum en auk lögreglumannsins eru tveir aðrir menn ákærðir í málinu sem lögreglumaðurinn átti í samskiptum við vegna starfs síns. 

Annar þeirra, Pétur Axel Pétursson, á fimmtán ára sakaferill að baki en þyngsti dómurinn er sex mánaða skilorðsbundið fangelsi fyrir vörslu kannabisplantna og hass. Til viðbótar hefur honum verið gerð sex sinnum refsing fyrir fíkniefnabrot. Pétur Axel neitaði sömuleiðis sök við þingfestingu í morgun.

Þriðji maðurinn, Gottskálk Ágústsson framkvæmdastjóri hjá Öryggismiðstöðinni, er svo ákærður fyrir að samskipti við lögreglumanninn sem var lofað tveimur flugmiðum og hálfri milljón í peningum fyrir að útvega manninum skýrslu PriceWaterHouseCoopers um Kaupþing banka. Hann neitaði sömuleiðis sök.

Vilja að aðalmeðferð verði lokuð

Helgi Magnús Gunnarsson, vararíkissaksóknari og saksóknari í málinu, fer fram á að hluti aðalmeðferðar í málinu fari fram fyrir luktum dyrum. Telur hann að málflutningur og vitnaleiðslur kalli á það. Vilhjálmur H. Vilhjálmsson, verjandi Péturs Axels, fer fram á að þinghald verði alfarið lokað.

Þá var tekist á um það í morgun hvort verjendur fengu afrit af upptökum sem saksóknari hefur undir höndum. Féllst saksóknari á að verjendur fengju að hlusta á upptökurnar en fengu þær ekki afhentar.

Fyrirtaka í málinu verður þann 6. janúar. 
Ákæruliðirnir sem snúa að lögreglumanninum eru alls fjórir og er fjallað um þá hér að neðan.

Gottskálk mætir í dómssal ásamt verjanda sínum, Eiríki Elís Þorlákssyni.Vísir/Ernir
Eiga að hafa hist á fundi í Öskjuhlíð

Í fyrsta lið ákærunnar er lögreglumaðurinn Jens, sem starfaði í fíkniefnadeild lögreglunnar, ákærður fyrir brot gegn þagnarskyldu í starfi og Pétur Axel er ákærður fyrir hlutdeild í broti lögreglumannsins. Er því lýst í ákærunni að þeir hafi hist í Öskjuhlíð í Reykjavík síðsumars eða síðla hausts 2015. 

Á fundi þeirra á lögreglumaðurinn að hafa upplýst Pétur Axel um að hann hefði ekki heyrt minnst á hann hjá samstarfsmönnum sínum í deildinni í einn og hálfan til tvo mánuði. Þá á hann einnig að hafa greint Pétri frá innra skipulagi og málefnum fíkniefnadeildar auk þess að greina honum frá nöfnum og hlutverki lögreglumanna í deildinni. 

Þá á Jens einnig að hafa upplýst ítrekað um skráningar í upplýsingakerfi lögreglunnar sem heldur utan um fíkniefnamál, mansal og vændi þegar upplýsingar sem vörðuðu manninn voru skráðar þar. Gerðist þetta frá árinu 2013 til ársloka 2015 og er Pétur Axel ákærður fyrir að hafa hvatt Jens til þess að láta sér upplýsingarnar í té. 

Sakaður um að hafa sent manninum sms og heimtað pening

Í öðrum lið ákærunnar eru Jens og Pétur Axel ákærðir fyrir spillingu. Er lögreglumanninum gefið að sök að hafa látið meðákærða „lofa sér og tekið við frá honum Nokia 130 síma, og í lok mars 2015 eða síðar móttekið Samsung Galaxy fame síma að andvirði kr. 19.990 [...] í tengslum við starf ákærða [...] sem lögreglumaður,“ að því er segir í ákæru. 

Jens er einnig ákærður fyrir spillingu vegna sms-skilaboða sem hann sendi Pétri Axel í ágúst 2012 þar sem hann á að hafa heimtað pening af manninum. 

Ætlaði að láta manninn hafa skýrslu frá slitastjórn Kaupþings

Þriðji liður ákærunnar snýr einnig að spillingu og er Jens ákærður auk Gottskálks. 

Á Jens að hafa verið í sms-samskiptum við manninn þar sem hann lét lofa sér hálfri milljón í peningum og tveimur flugmiðum með WOW air gegn því að lögreglumaðurinn útvegaði Gottskálki skýrslu PriceWaterHouseCoopers um Kaupþing banka sem bar yfirskriftina „Slitastjórn Kaupþings banka hf. „Project Staying Alive“ September 2010. Strictly confidential.“

Ákærður fyrir stórfellda og ítrekað vanrækslu og hirðuleysi í starfi

Í fjórða lið ákærunnar er Jens svo ákærður fyrir brot í opinberu starfi. Á hann að hafa „gerst sekur um stórfellda og ítrekaða vanrækslu og hirðuleysi í starfi sínu, með því að varðveita 1,18 grömm af amfetamíni og 10 millilítra af vefaukandi sterum af gerðinni bodenón undecýlenat og 20 millilítra af testósterón prípíónati í skrifborðsskúffu á vinnustað sínum [...]“ eins og segir í ákæru. 

Þá er Jens einnig ákærður fyrir stórfellda og ítrekaða vanrækslu og hirðuleysi í starfi sínu „með því að hafa varðveitt tvær loftskammbyssur í skrifborðsskúffu á vinnustað sínum, en ákærði sem taldi byssurnar hafa verið haldlagðar af lögreglu, gat ekki skýrt hvaða máli þær tengdust, en þær átti að varðveita í geymslu fyrir haldlagða muni.“ 


Tengdar fréttir




Fleiri fréttir

Sjá meira


×