Sport

UFC vildi ekki hafa Diaz í húsinu þegar Conor tók seinna beltið: „Þeir gáfu Nick Jonas sætið mitt“

Tómas Þór Þórðarson skrifar
Nate Diaz og Conor McGregor börðust tvisvar sinnum og skiptu með sér sigrunum á árinu.
Nate Diaz og Conor McGregor börðust tvisvar sinnum og skiptu með sér sigrunum á árinu. vísir/getty

UFC-bardagakappinn Nate Diaz veit ekki hvort sambandið mun skipuleggja þriðju viðureign hans og írska, tvöfalda heimsmeistarans Conors McGregors. Eins og staðan er veit hann ekki hvort UFC vilji hafa þá tvo í sama húsi.

Diaz var mættur á bardaga Conors gegn Eddie Alvarez í New York aðfaranótt sunnudags þar sem Írinn varð heimsmeistari í léttvigt. Það var þó ekki UFC að þakka að Diaz sá bardagann því Dana White, forseti UFC, hafnaði beiðni bardagakappans um miða á UFC 205 og bar við að ekki væri pláss fyrir hann.

„Um leið og McGregor vann litu hundruðir manna á mig og störðu. Ég bara bara: „Hey, hvað viljið þið að ég geri.“ UFC vildi ekki einu sinni gefa mér miða á bardagann. Ég held að Nick Jonas hafi fengið sætið mitt,“ segir Nate Diaz í viðtali við ESPN.

Diaz vill berjast aftur við Conor en ætlar ekki á hnén. vísir/getty

Slæm hugmynd
Diaz var fyrsti maðurinn til að vinna Conor McGregor í UFC þegar kapparnir börðust í mars en Írinn kom fram hefndum í ágúst og vann á dómaraúrskurði eftir fimm lotur. Bardagarnir tveir heppnuðust vel þegar horft er á peningana en þeir eru í tveimur af þremur efstu sætunum þegar kemur að áskriftarkaupum í sögu UFC.

Eftir seinni bardagann sagði Conor að hann myndi á endanum berjast þriðja sinni við Diaz og þá í léttvigt en það er þyngdarflokkurinn sem hann varð heimsmeistari í um helgina. Diaz er samt ekki viss um að það verði eitthvað af því.

„UFC veit að það er slæm hugmynd hjá honum. Hvers vegna fékk ég ekki miða? Ég sagði við þá að ég myndi láta hann í friði. Ég vil ekki berjast við gaurinn. Ég vildi bara fá sæti í húsinu fyrir mig og bróðir minn en UFC vildi fá hvorugan okkar á staðinn. UFC vill bara fela mig, held ég, og gera Conor að enn stærri stjörnu en það er búið að gera nú þegar,“ segir Diaz.

Diaz og Conor rifu kjaft í marga mánuði en féllust svo í faðma eftir bardagann. vísir/getty

Ekki bestur
Bandaríkjamaðurinn hrósaði Conor fyrir sigurinn á Alvarez en er enn þá á því að hann sé betri en Írinn og að hann viti það eftir bardagana tvo á þessu ári.

„Fólk spyr mig hvenær við ætlum að berjast aftur. Ég veit að allir verða að sjá það. Ef ég geri eitthvað þá verður það að berjast við Conor en ég mun ekki grátbiðja um þann bardaga. Ef einhver ætti að biðja um þann bardaga væri það Conor. Hann er sá sem hefur eitthvað að sanna,“ segir Diaz.

„Til hamingju Conor. Hann stóð sig frábærlega og er nú með tvö belti. Við báðir vitum samt hvað gerðist í bardögum okkar og að þetta „hann sé bestur í sögunni“-kjaftæði þarf að hætta. Ég man ekki eftir því að nokkur sem hefur verið talinn sá besti allra tíma hafi fengið aðra eins útreið og hann fékk í bardögum okkar,“ segir Nate Diaz.


Tengdar fréttir

Sjáðu rothöggið hjá Conor | Myndband

Conor McGregor braut blað í sögu UFC í nótt þegar hann varð meistari í léttvigt eftir sigur á Eddie Alvarez á UFC 205 í Madison Square Garden í New York.

Conor McGregor tvöfaldur meistari

UFC 205 fór fram í nótt þar sem Conor McGregor rotaði Eddie Alvarez. Þar með er McGregor léttvigtar- og fjaðurvigtarmeistari UFC.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira