Innlent

Sigmundi brá þegar hann sá mörg ný andlit stíga úr rútum við Háskólabíó

Tryggvi Páll Tryggvason skrifar
Sigmundur Davíð og Anna Sigurlaug kona hans eftir formannskjörið á sunnudag þar sem hann laut í lægra haldi fyrir Sigurði Inga.
Sigmundur Davíð og Anna Sigurlaug kona hans eftir formannskjörið á sunnudag þar sem hann laut í lægra haldi fyrir Sigurði Inga. vísir/anton brink

Sigmundur Davíð Gunnlaugsson og Sigurður Ingi Jóhannsson hafa enn ekki rætt saman eftir að sá síðarnefndi bar sigurorð af Sigmundi Davíð í formannsslag Framsóknarflokksins um helgina. Sigmundur segir að sér hafi brugðið þegar fjöldinn allur af fólki mætti á flokksþingið skömmu fyrir formannskosningarnar.

„Þetta leit ágætlega út á á laugardeginum og ég var ekkert sérstaklega áhyggjufullur þó maður tæki engu sem gefnu. Svo allt í einu, þegar kominn var sunnudagur og klukkan orðin ellefu, þá komu rúturnar upp að Háskólabíói og birtist mikill fjöldi fólks sem ég hef aldrei séð áður þann tíma sem ég hef starfað í flokknum,“ sagði Sigmundur Davíð í viðtali Í bítinu á Bylgjunni í morgun en hlusta má á viðtalið í heild sinni hér að ofan.

Ýmsir Framsóknarmenn hafa rætt um að svindlað hafi verið í formannskjörinu og Jóhannes Þór Skúlason, aðstoðarmaður Sigmundar í gær að aðdragandinn að kosningunum hafi vakið upp vondar tilfinningar. Sigmundur vill þó ekki ganga svo langt að svindlað hafi verið en segir að margt hafi verið öðruvísi en æskilegt gæti talist.

Sigmundur Davíð Gunnlaugsson yfirgaf salinn eftir að niðurstöður formannskjörsins voru kynntar. vísir/anton

„Til dæmis var furðu mörgu fólki vísað frá, fékk ekki að kjósa, jafnvel fólk sem búið var að innrita sig á þingið. Ég hef ekki alveg áttað mig á því, né aðrir, á hvaða forsendum það var gert,“ sagði Sigmundur Davíð. „Það voru ýmsir leikir leiknir á þessu þingi og í aðdraganda þess, ekki allir fallegir. Ég ætla ekki að fullyrða um það að menn hafi beinlínis svindlað í kosningum.“

Mjög ósáttur með niðurstöðuna

Sigmundur Davíð sagði einnig að hann og Sigurður Ingi hefðu enn ekki talað saman eftir úrslit kosninganna. Aðspurður hvort andaði köldu á milli hans og Sigurðar Inga svaraði hann:

„Já, það er það náttúrulega, ég skal alveg viðurkenna það en í pólitík verða menn að láta sig hafa það að vinna saman.“

Segir Sigmundur að hann hafi ef til vill verið full værukær í aðdraganda kosninganna og ekki beðið stuðningsmenn sína sérstaklega um að mæta á kjörþingið. Hann hafi ekki búist við slag um formannsembættið.

„Menn bjuggust ekki við slag á meðan annnarstaðar hafði verið fyllt mjög vel á lista með fólki sem var kannski ekki í öllum tilvikum virkir flokksmenn og tilkynnt um framboðið tveimur klukkustundum eftir að framboðsfrestur rann út,“ segir sagði Sigmundur sem stefnir ótrauður á það að leiða lista Framsókarflokksins í Norðausturkjördæmi í komandi kosningum. Ekki hafi hvarflað að honum að yfirgefa flokkinn eftir úrslit helgarinnar.

„Nei, ég var mjög ósáttur við þessa niðurstöðu en það var ekki einu sinni valkostir í mínum huga að yfirgefa fólkið í kjördæminu sem búið er að styðja mig mjög vel. Ég hef skyldum að gegna þetta við þetta fólk sem ég ætla að standa undir.“


Tengdar fréttir

Sigmundur Davíð: „Á flokksþinginu og í aðdraganda þess urðu atburðir sem ég hefði ekki trúað að gætu átt sér stað í Framsóknarflokknum“

Sigmundur Davíð Gunnlaugsson fyrrverandi formaður Framsóknarflokksins trúði því ekki að þeir atburðir sem áttu sér stað á flokksþingi Framsóknarmanna og aðdraganda þess gætu átt sér stað í flokknum. Þess vegna hefur hann ekki viljað ræða við fjölmiðla efitr þingið og segist enn ætla að bíða með það.

Ósigur Sigmundar

Flokksþing Framsóknarflokksins hverfðist um formannskjör á milli Sigmundar Davíðs Gunnlaugssonar, sitjandi formanns, og Sigurðar Inga Jóhannssonar forsætisráðherra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.