Innlent

Kynntu hundana fyrir nágrönnunum

Samúel Karl Ólason skrifar
mynd/hilmar birgir

Íbúar þriggja íbúða í Stakkholti 2-4 hafa undanfarna daga staðið í deilum við nágranna sína vegna hunda. Á húsfundi 2. júní stendur til að kjósa um hvort að þeim verði leyft að búa með hunda sína í húsinu. Nú í dag buðu þau íbúum hússins að hitta hundana þrjá á Klambratúni.

Um er að ræða þrjú ung pör og settu þau upp heimasíðuna Stakkholtshundar, til að kynna málstað sinn fyrir nágrönnunum. Þau segjast hafa lagt sig fram við að láta sem minnsta truflun vera af hundunum. Þeim hafi ekki fylgt óþrifnaður, lítið hafi heyrst í þeim og þeir komi sáralítið inn í sameign hússins.

Hilmar Birgir Ólafsson segir að þau hafi sett upp síðuna Stakkholtshundar til þess að sannfæra nágranna sína um að kjósa með þeim og kynna þeim fyrir hundunum og hve lítil truflunin væri í raun af þeim.

„Síðan er þetta búið að vinda upp á sig og er komið út um allt. Það er margt fólk búið að hafa samband við mig og sína stuðning. Þetta hafa verið skemmtilegir dagar,“ segir Hilmar. „Við buðum fólkinu í blokkinni að koma og kíkja á hundana ef þau vildu. Að leyfa krökkunum að heilsa upp á þá og svona. Það mættu um tíu manns og kíktu á okkur sem eru fleiri en við áttum von á. Við bjuggumst við engum.“

„Það er fullt af nágrönnum búnir að sýna okkur stuðning og segjast ætla að kjósa með okkur. Maður er miklu bjartsýnni en maður var áður en þetta byrjaði allt saman. Ég hefði aldrei ímyndað mér að þetta myndi springa svona í loft upp. Fólk allsstaðar í samfélaginu og þá sérstaklega hundaeigendur hafa sýnt okkur mikinn stuðning.“

Hilmar segir að honum finnist lögin furðulega ströng hér á landi varðandi hunda. Þeir séu í fjölbýlishúsum um allan heim og það virðist ekki verða til mikilla vandræða.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.