Fastir pennar
Óli Kristján Ármannsson

Forskotið

Óli Kristján Ármannsson skrifar

Fjörutíu og fimm dagar eru í dag til forsetakosninga hér á landi og rúm vika þar til framboðsfrestur rennur út.

Munur á efstu mönnum í könnun Fréttablaðsins, Stöðvar 2 og Vísis á fylgi við fram komna frambjóðendur sem birt er í dag er jafnvel enn meiri en munur á milli forsetaframbjóðenda í upphafi kvikmyndarinnar Our brand is crisis sem út kom í fyrra og er byggð á forsetakosningunum í Bólivíu 2002.

Jafnvel svo mikill að velta megi fyrir sér hvort hér verði yfirhöfuð skemmtileg kosningabarátta.

Myndin er hins vegar ágætisskemmtun og skartar Söndru Bullock í aðalhlutverki. Hún er dramatísering á því þegar kosningastjórar voru fengnir frá Bandaríkjunum til aðstoðar við frambjóðendur í Bólivíu og hvernig persónu Söndru Bullock tókst að hífa fylgi gamla forsetans úr tíu prósentunum, á meðan vinsælasti frambjóðandinn var með 39 prósent og koma honum í sigursæti með leikjabrögðum.

Helsta brella hennar var að láta sinn mann hamra á því að óvissutímar væru fram undan og krísa sem styrka hönd þyrfti til að taka á. Skemmtilegur endurómur þar við orðræðu í upphafi baráttunnar hér. Í myndinni voru hins vegar 80 dagar í kosningar þegar slagurinn hófst fyrir alvöru.

Niðurstaða könnunarinnar sem birt er í blaðinu í dag sýnir afgerandi forystu Guðna Th. Jóhannessonar, en 69 prósent af þeim sem afstöðu taka ætla að greiða honum atkvæði sitt.

Í öðru sæti er nýframkominn frambjóðandi Davíð Oddsson, ritstjóri Morgunblaðsins og fyrrverandi formaður Sjálfstæðisflokksins, fyrrverandi forsætis- og fjármálaráðherra, fyrrverandi borgarstjóri og fyrrverandi formaður bankastjórnar Seðlabanka Íslands.

Titlarnir fanga fyrirferð frambjóðandans í landsmálunum síðustu áratugi, en fylgi við hann mælist 13,7 prósent.

Líklega hefði maður að óathuguðu máli búist við meira fylgi við Davíð vegna sterkra tengsla hans við einn stærsta stjórnmálaflokk landsins.

En með umdeildar ákvarðanir á borð við stuðning Íslands við stríð Bandaríkjamanna í Írak, einkavæðingu bankanna, og náttúrlega hrunmálin í huga er fylgið kannski bara furðu mikið.

Á eftir Davíð kemur Andri Snær Magnason rithöfundur með 10,7 prósenta fylgi. Aðrir frambjóðendur mælast með mun minna, en af þeim rís athafnakonan Halla Tómasdóttir hæst með eitt prósent að baki sér.

Ólafur Ragnar Grímsson, fráfarandi forseti, sem dregið hefur sig úr kosningabaráttunni mælist með 3,2 prósent.

Þó að kosningabaráttan sé rétt að byrja er vandséð að annað en stóráföll gætu orðið til að breyta þeirri stöðu sem upp er komin og þeim mikla meðbyr sem framboð Guðna Th. virðist hafa.

Í kvikmyndinni um bólivísku kosningarnar þurfti gamli refurinn að loka 29 prósenta gati á tveimur og hálfum mánuði. Hér munar 55 prósentum á fylgi efstu manna í forsetakosningunum. En um leið er vert að hafa í huga að baráttan er rétt að byrja.

Menn eiga enn eftir að mætast í kappræðum og líklegt að fylgi við frambjóðendur geti enn tekið breytingum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.



Velkomin á Vísi. Þessi vefur notar vafrakökur. Sjá nánar.