Innlent

Lóan er komin til landsins

Jóhann Óli EIðsson skrifar
Lóan í fjörunni í morgun.
Lóan í fjörunni í morgun. mynd/guðmundur falk

Lóan er komin hingað til lands. Óhrekjandi sönnun þess var fest á filmu af ljósmyndaranum Guðmundi Falk nú skömmu fyrir hádegi skammt frá Garðskagavita. Fuglinn er ekki enn kominn í sumarbúning en þess ætti ekki að vera langt að bíða.

Lóan er örlítið seinna á ferð en í fyrra en þá kom hún þann 19. mars. Það er talsvert seinna en árið 2012, sem var sögulegt, en þá kom lóan þann 12. mars. Meðalkomutími fuglsins undanfarna tvo áratugi er 23. mars.

Nú er bara spurning hvort að hún kveði ekki burt snjóinn líkt og segir í kvæðinu.


Tengdar fréttir

Lóan komin í Elliðaárdal

Lóan er komin í Elliðaárdal. Fuglaáhugamaður á ferð um dalinn sá tvær lóur í dag og smellti nokkrum ljósmyndum af þeim. Hann kvaðst fyrst hafa heyrt hinn angurblíða söng lóunnar, hjarta sitt hafi þá tekið kipp, og hann gengið á hljóðið og fljótlega fengið staðfestan grun sinn. Lóurnar spókuðu sig í móa skammt frá bökkum Elliðaánna, ofan við gömlu Vatnsveitubrúna, ekki langt frá svæði Fáks, og voru þær því strangt til tekið í þeim hluta dalsins sem nefnist Víðidalur. Fuglaáhugamaðurinn telur lóuna í ár um viku til tíu dögum seinna á ferðinni í Elliðardal miðað við undanfarinn áratug. Hún sé núna á svipuðum tíma og var fyrir síðustu aldamót, þegar hún var að koma í dalinn í kringum 20. apríl. Eftir aldamót hafi hún hins vegar verið fyrr á ferðinni, og fyrstu lóurnar yfirleitt sést milli 9. og 14. apríl, þar til núna. Hann giskar á að kuldakastið að undanförnu og óhagstæðar vindáttir fyrir farfugla geti skýrt þessa seinkun lóunnar í ár.

Lóan og hrossagaukurinn komin til landsins

Hinn ótvíræði vorboði okkar Íslendinga, lóan er nú komin til landsins. Hún var í morgun að spígspora við Innsta Vog á Akranesi og þá lét íbúi í uppsveitum Borgarfjarðar ritstjórn vita af komu lóunnar þar einnig í morgun. Þá heyrðist líka í hrossagauki þannig að nú má gera ráð fyrir að farfuglarnir fari hver af öðrum að koma til landsins í stórum hópum. Ástæ

Lóan er komin

„Starfsmenn Náttúrustofu Vestfjarða fóru yfir í Dýrafjörð í gær og sá heiðlóu á túnunum í Hvammi í Dýrafirði. Þar sást hún fyrst, blessunin. Þetta er nú í fyrra lagi. Stundum hef ég séð hana fyrstur en þeir voru á einhverri yfirferð þarna félagarnir og urðu fyrri til,“ segir Hilmar Pálsson, fuglaáhugamaður á Ísafirði. Einnig sást grágæs á svæðinu. Þar með er staðfest að vorboðinn ljúfi er kominn á svæðið og hugsanlegt er að henni takist að kveða burt snjóinn sem enn liggur yfir láði víða á Vestfjörðum.

Heiðlóan komin með fyrra fallinu

„Þetta er alltaf gleðiefni. Við skulum bara vona að vorið sé að koma,“ segir Guðmundur A. Guðmundsson hjá Náttúrufræðistofnun Íslands um þær fréttir að fyrsta lóa ársins hafi sést við Útskála í Garði í fyrrakvöld.



Fleiri fréttir

Sjá meira