Innlent

Kenna stelpum í Gabon að standa á eigin fótum

Stefán Rafn Sigurbjörnsson skrifar
Skátaflokkur Guðrúnar eftir vígsluathöfn í skátahreyfinguna.
Skátaflokkur Guðrúnar eftir vígsluathöfn í skátahreyfinguna. Mynd/Guðrún Björg

„Við erum báðar skátar þannig að við ákváðum að byrja með þetta þar sem okkur er skylt að vera með eftirskólaprógramm fyrir stelpurnar.“

Guðrún Björg Ingimundardóttir er kennari hjá alþjóðlegum skóla í Gabon, Ecole Ruban Vert. Hún og kenískur samkennari hennar stofnuðu alþjóðlegan skátaflokk fyrir stelpur í skólanum.

Guðrún Björg Ingimundardóttir

„Þetta er grænn skóli sem leggur mikla áherslu á sjálfbærni og náttúruvernd þannig að okkur þótti tilvalið að byrja með skátastarf vegna þess að margt í skátastarfi er svipað og sjálfbærnin miðar að,“ segir Guðrún.

„Það er virk skátahreyfing í Gabon en hún er ekki jafn opin öllum eins og á Íslandi,“ segir hún en hún telur að hreyfingin í Gabon sé mun kynjaskiptari og kristnari en þekkist á Íslandi.

„Sérstaðan hjá okkur er að stelpurnar í skátaflokknum okkar eru alls staðar að. Við erum með stelpur frá Gabon, Bandaríkjunum, Líbanon, Nígeríu og Frakklandi. Það er ekki til í landinu, svo ég viti, skátafélag sem tekur á móti krökkum alls staðar að.“

Eins og fram hefur komið er einn af þáttunum að kenna stelpunum að koma fram við umhverfið af virðingu en ekki síður að efla sjálfstraust þeirra.

„Við leggjum mikla áherslu á það að stelpurnar beri virðingu fyrir sjálfum sér og öðrum. Það felur í sér að þær verði sjálfstæðir einstaklingar.“
Til að mynda kenna þær yngstu stelpunum að elda og sauma, ekki til að þær alist endilega upp til að verða húsmæður heldur til að þær geti staðið á eigin fótum.

„Það helst í hendur við það að gera þetta á þann hátt að valda ekki umhverfinu skaða. Við lærum að endurvinna hráefni og rusl. Við viljum skilja við heiminn betri en við fundum hann,“ segir Guðrún.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.