Sport

Hafa selt minna en helming miða í boði á ÓL í Ríó

Óskar Ófeigur Jónsson skrifar
Merki Ólympíuleikanna í Ríó.
Merki Ólympíuleikanna í Ríó. Vísir/Getty

Skipuleggendur Ólympíuleikanna í Ríó sem fara fram í ágúst næstkomandi hafa ekki náð að selja helming miða í boði á viðburði leikanna.

7,5 milljónir miða voru í boði á íþróttaviðburði Ólympíuleikanna sem standa yfir frá 5. til 21. ágúst.

„Við höfum selt um 47 prósent miðanna," sagði Mario Andrada sem er talsmaður skipulagsnefndar leikanna í samtali við BBC.

Það hefur samt gengið mun betur að selja miða á eftirsóttustu viðburðina á ÓL í Ríó 2016 en 75 prósent miða hafa verið seldir á Opnunarhátíðina sem og vinsælustu íþróttakeppnirnar.

Forráðamenn leikanna hafa þegar fengið 195 milljónir dollara í kassann fyrir sölu á þeim miðum eða rúmlega 25 milljarða íslenskra króna.

Það hefur verið mikið skrifað um Zika vírusinn í aðdraganda leikanna og óttinn um útbreiðslu hans er ekki að hjálpa til við sölu miða á leikana ekki frekar en mun verra efnahagsástand innan Brasilíu.

Skipuleggendur Ólympíuleikanna í London 2012 voru búnir að ná markmiði sínum í miðasölu mörgum mánuðum fyrir leikanna.

Alls voru seldir 8,2 milljónir miða á leikana í London eða 96 prósent þeirra miða sem voru í boði.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira