Innlent

Hjólaleigur verði í Reykjavík að ári

Sunna Kristín Hilmarsdóttir skrifar
Hjólaleigur hafa notið mikilla vinsælda í London, bæði á meðal heimamanna og ferðamanna.
Hjólaleigur hafa notið mikilla vinsælda í London, bæði á meðal heimamanna og ferðamanna. vísir/getty

Borgarráð samþykkti samhljóða á fundi sínum í dag að auglýsa í forvali eftir áhugasömum aðilum til að koma á fót og reka hjólaleigu í Reykjavík, en hjólaleigur hafa slegið í gegn í borgum víða um heim, til að mynda í London, New York og París.

S. Björn Blöndal, formaður borgarráðs, segir ekki ljóst hvenær hægt yrði að taka hjólaleigur í gagnið í Reykjavík en segir raunhæft að miða mögulega við næsta vor.

„Hugmyndin er sú að fá útfærslu að þessu frá þeim sem senda inn tillögur, til að mynda varðandi tæknilegu hliðina á verkefninu, en við viljum auðvitað að þetta verði með þeim hætti að sem flestir geti nýtt sér þetta,“ segir Björn. Þannig muni borgin ekki koma til með að reka leigurnar en borgarland verði vissulega nýtt undir þær.

Öflugt tól varðandi samgöngur
Mögulegar staðsetningar hjólaleiga sem hafa verið nefndar eru til dæmis í Kvosinni, við Háskóla Íslands, Háskólann í Reykjavík og við Hlemm.

„Fyrirmyndirnar eru auðvitað mýmargar og það eru svona leigur mjög víða. Víðast hvar eru það fyrirtæki sem reka þetta sem hafa sérhæft sig í rekstri svona leiga. Þetta getur auðvitað verið mjög öflugt tól varðandi samgöngur fyrir íbúana og það er mesti ávinningurinn í því. Svo væri notkun ferðamanna bara bónus,“ segir Björn.

Í september 2014 var skipaður starfshópur um hjólaleigu í Reykjavík en í minnisblaði hópsins er lagt til að aðkoma borgaryfirvalda verði fyrst og fremst fólgin í að skapa aðstöðu fyrir leigurnar en aðrir sjái um uppsetningu og rekstur, en á meðal þess sem kanna þarf í forvalinu er fjöldi hjóla og leigustöðva, tæknilegar lausnir og staðsetning.


Tengdar fréttir

Hjólreiðar: Kúlurassar í Reykjavík

Sannkallað reiðhjólaæði ríkir í Reykjavík og reyndar um land allt. Útsendari Vísis kannaði málið og vann bug á djúpstæðum fordómum sínum í garð hjólafólks.

Skoða rekstur hjólaleigukerfis

Borgarráð Reykjavíkur samþykkti á fundi sínum í gær að skipaður yrði starfshópur sem á að skoða möguleikann á því að koma á laggirnar hjólaleigukerfi í Reykjavík.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira