Handbolti

Óskar Bjarni er tilbúinn að þjálfa landsliðið en ekki Gunnar

Henry Birgir Gunnarsson skrifar
Óskar Bjarni Óskarsson.
Óskar Bjarni Óskarsson. Vísir/Andri Marinó

Það hafa ýmsir menn verið orðaðir við starf landsliðsþjálfara A-liðs karla í handbolta síðustu vikur. Nöfn manna sem hafa tengst liðinu á síðustu árum. Menn eins og Óskar Bjarni Óskarsson og Gunnar Magnússon.

Einnig hafa nöfn fyrrverandi landsliðsmannanna Geirs Sveinssonar og Kristjáns Arasonar verið í umræðunni.

Gunnar er að þjálfa Hauka og tjáði Fréttablaðinu í gær að hann væri ekki að sækjast eftir aðalþjálfarastarfinu. Hann útilokaði þó ekki að vinna með HSÍ áfram en hann hefur verið með landsliðinu frá árinu 2002.

Það var aðeins á þeim stutta tíma sem Viggó Sigurðsson þjálfaði liðið sem Gunnar var ekki hluti af þjálfarateyminu.

Óskar Bjarni Óskarsson var aðstoðarþjálfari liðsins er það vann silfur í Peking og brons í Austurríki á EM. Hann hætti með landsliðinu árið 2012 en sagði í gær að hann væri til í að snúa aftur.

„Ég er til í að taka liðið að mér eða aðstoða annan mann. Ég er klár í verkefnið en hef ekki heyrt frá neinum enn sem komið er. Ég naut þess að vera með landsliðinu á sínum tíma og er til í að koma aftur,“ segir Óskar Bjarni.


Tengdar fréttir

Ætla að finna nýjan landsliðsþjálfara í þessum mánuði

Formaður HSÍ, Guðmundur B. Ólafsson, hefur engar áhyggjur þó svo ekki sé búið að finna arftaka Arons Kristjánssonar sem hætti í janúar. Ekki virðist vera búið að ræða við neinn þjálfara um að taka að sér starfið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira