Enski boltinn

Brunt fékk smámynt í andlitið: "Viðbjóðsleg hegðun"

Anton Ingi Leifsson skrifar
Brunt alveg æfur í leikslok.
Brunt alveg æfur í leikslok. vísir/getty

Chris Brunt, kantmaður West Bromwich Albion, segir að hann sé fullur ógeðs og skammist sín eftir að hann fékk smámynt í andlitið frá stuðningsmanna WBA eftir tapleik í gær.

Brunt labbaði til stuðningsmanna WBA eftir að ljóst var að liðið var dottið úr bikarnum eftir 3-1 tap gegn B-deildarliði Reading sem endaði með þessum látum.

„Ef fólk kemur á fótboltaleiki og heldur að það sé ásættanlegt að henda mynt í fótboltaleikmenn eða einhvern annan, þá er það andstyggilegt," sagði Brunt við BBC Sport í leikslok.

Enska knattspyrnusambandið hefur gefið út að þeir munu rannsaka atvikið og WBA hefur einnig gefið út að þeir munu aðstoða knattspyrnusambandið við rannsóknina.

„Allir okkar tryggu stuðningsmenn munu hjálpa félaginu í að finna út hvaða einstaklingar áttu hlut í þessari hegðun undir lok bikarleiksins," segir meðal annars í tilkynningu frá WBA.

Þessi norður írski leikmaður hefur verið hjá WBA frá árinu 2007 og spilað meira en 300 leiki fyrir félagið, en hann, skiljanlega, brást illur við þegar hann fékk myntina í andlitið.

„Ég var að labba til stuðningsmanna okkar og þeir héldu að það væri eðlilegt að henda mynt í þeirra eigin leikmenn. Þetta er algjörlega viðbjóðslegt," sagði Brunt og hélt áfram:

„Ég vona að lögreglan handtaki þessa menn því ég hef aldrei séð neitt þessu líkt í mínu lífi. Ég skil svekkelskið - við höfðum ekki spilað vel í síðari hálfleiknum og þegar þú ert 1-0 yfir í hálfleik áttu ekki að tapa 3-1."

„Það eru börn sitjandi í fremstu röðunum og ég vil ekki fara með börnin mín á fótboltaleiki svo þau sjá eitthvað þessu líkt," sagði hundsvekktur Brunt í leikslok.



Fleiri fréttir

Sjá meira