Enski boltinn

Klopp vildi mæta Man Utd

Ingvi Þór Sæmundsson skrifar
Klopp og Van Gaal innilegir.
Klopp og Van Gaal innilegir. vísir/getty

Jürgen Klopp varð að ósk sinni þegar Liverpool og Manchester United drógust saman í 16-liða úrslitum Evrópudeildarinnar í dag.

Þetta verður í fyrsta sinn sem þessir erkifjendur mætast í Evrópukeppni en fyrri leikurinn fer fram á Anfield 10. mars og sá seinni á Old Trafford viku seinna.

Sjá einnig: Liverpool fær miklu meiri hvíld en United fyrir seinni leikinn

„Þetta er frábært. Við eigum skilið að fá svona leiki,“ sagði Klopp og bætti við: „Þetta verður ekki auðvelt en ég vildi fá Man United.“

United vann leik liðanna á Anfield í janúar með einu marki gegn engu og Klopp vill ólmur hefna fyrir þann ósigur sem honum fannst ekki sanngjarn.

„Við þurfum að jafna sakirnar. Við spiluðum vel á móti þeim á Anfield en töpuðum 0-1.

„Nú fáum við tækifæri til að svara fyrir okkur og það munum við reyna að gera,“ sagði Þjóðverjinn sem er á fullu að undirbúa sína menn undir úrslitaleikinn í deildabikarnum gegn Manchester City á sunnudaginn.

Leikur Liverpool og Man City hefst klukkan 16:30 á sunnudaginn og verður sýndur í beinni útsendingu á Stöð 2 Sport og Stöð 2 Sport 2.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira