Innlent

Stífar reglur vegna mataráskriftar þolraun fyrir stúlku

sunna karen sigurþórsdóttir skrifar
Dæmi eru um að börn sitji ein í matmálstímum.
Dæmi eru um að börn sitji ein í matmálstímum. vísir/pjetur

Unglingsstúlka í Árbæjarskóla hefur þurft að leita stuðnings sérfræðinga vegna fyrirkomulags skólans þess efnis að meina börnum, sem ekki eru í mataráskrift hjá Reykjavíkurborg, að borða hádegismat sinn með öðrum nemendum í mötuneytinu. Stúlkan er ekki í mataráskrift sökum heilsufarsástæðna.

Fyrirkomulagið er með þeim hætti að einungis börn í mataráskrift fá að borða í mötuneyti skólans á matmálstímum. Foreldrum var tilkynnt, eftir að kvartanir tóku að berast, að þetta væri gert til að koma í veg fyrir að börnin væru að deila matnum með öðrum, því hann væri af skornum skammti. Nemendur í mataráskrift eiga rétt á að fá sér tvisvar á diskinn.

Sjá einnig: Börn ekki í mataráskrift þurfa að borða annars staðar

Móðir stúlkunnar leitaði til skólastjórnenda vegna málsins, og voru svörin þau að ekki væri hægt að breyta þessu fyrirkomulagi. Málið tók verulega á barnið sem ræddi leitaði frekari stuðnings. Að sögn móðurinnar eru allar hennar vinkonur í mataráskrift og því hefur stúlkan þurft að sitja ein utan matsalarins. Vinkonur hennar sýni henni þó fullan skilning og reyni að klára mat sinn eins fljótt og auðið sé, svo hún þurfi ekki að vera ein allt hádegið.

Móðirin, sem ekki vill láta nafns síns getið, segist afar ósátt og vill að fundið verði annað fyrirkomulag á matmálstímum nemenda.  

Greint var frá þessu fyrirkomulagi skólans á Vísi í gær. Foreldri sem rætt var við sagði nokkur dæmi þess að börn sitji ein á matmálstíma, því flest öll börn séu í mataráskrift. Skólastjóri sendi foreldrum bréf þar sem fram kom að ástæða þess að ekki sé hægt að blanda nemendum á unglingastigi saman í mat sé sú að skólinn ráði ekki við að þjónusta þá með þeim hætti. Reynt hafi verið að blanda nemendum saman þar sem ekki hafi gengið að þeir hafi borðað hver af annars diski. Dæmi sé um að maturinn hafi klárast og að þeir sem voru í áskrift hafi ekki fengið sinn skammt.

Foreldrið sagði sögum þó ekki bera saman, því kvartanir hafi borist um að börn á miðstigi hafi ekki fengið að snæða með skólasystkinum sínum. Samkvæmt upplýsingum frá foreldrafélaginu er unnið að því að leysa málið í samráði við skólastjórn.


Tengdar fréttir

Vill að dóttir sín skipti um skóla

Móðir ellefu ára gamallar stelpu, sem fékk ekki að taka þátt í pítsuveislu í Fellaskóla í tilefni öskudags þar sem hún var ekki í mataráskrift í skólanum, segir koma til greina að hún skipti um skóla vegna málsins. Sviðstjóri skóla og frístundasviðs borgarinnar segir skólayfirvöld hafa brugðist rétt við í málinu.




Fleiri fréttir

Sjá meira