Innlent

Vilja þjónustu og farsímasenda

Óli Kristján Ármannsson skrifar
Þótt Suðurstrandarvegur milli Grindavíkur og Þorlákshafnar sé greiðfær á sumrin er ekki sömu sögu að segja allan veturinn.
Þótt Suðurstrandarvegur milli Grindavíkur og Þorlákshafnar sé greiðfær á sumrin er ekki sömu sögu að segja allan veturinn. vísir/gva

Bæjarráð Ölfuss tekur undir áskorun bæjarráðs Árborgar til Vegagerðarinnar frá því í janúarlok um að breytt verði skilgreiningum á vetrarþjónustu á Suðurstrandarvegi. Farið er fram á að þjónusta á veginum verði færð upp um þjónustuflokk.

„Miðað við umferð ætti Suðurstrandarvegur að vera í þjónustuflokki 3 og vera með vetrarþjónustu 5 daga vikunnar.

Vegna tíðra lokana Suðurlandsvegar á Hellisheiði og í Þrengslum er mjög brýnt að hafa möguleika á að beina umferð um Suðurstrandarveg,“ segir í bókun bæjaráðs Árborgar. „Lokanir á Suðurlandsvegi hafa mikil og neikvæð áhrif á íbúa og fyrirtæki á svæðinu og er nauðsynlegt að hafa aðra leið færa milli Suðurlands og höfuðborgarsvæðisins/Suðurnesja.“

Bæjarráð Ölfuss hefur nú falið bæjarstjóra sínum að fylgja málinu eftir við Vegagerðina og áréttar jafnframt að til að tryggja öryggi vegfarenda og út frá almannavarnasjónarmiðum þurfi sem fyrst að ráðast í uppsetningu senda á Suðurstrandarvegi og Þrengslavegi. „En stór hluti Suðurstrandarvegar og hluti Þrengslavegar eru utan farsímasambands,“ segir í bókun bæjarráðsins á fundi þess 11. þessa mánaðar. Bókunin var samþykkt samhljóða. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira