Innlent

Gripinn með íslensk hvalbein í Baltimore

Þorbjörn Þórðarson skrifar
Hér gefur að líta beinin sem maðurinn var með í töskum sínum.
Hér gefur að líta beinin sem maðurinn var með í töskum sínum. Mynd/bandaríska tollgæslan (U.S. Customs and Border Protection)
Hvalbein í fórum ferðamanns sem var nýkominn frá Íslandi voru gerð upptæk meðan staðreynt er hvort þau séu úr tegundum sem eru á lista yfir dýr í útrýmingarhættu.

Tollverðir á Baltimore Washington International flugvellinum í Baltimore gerðu athugasemdir við farangur farþega sem þar lenti eftir flug frá Íslandi þegar hvalbein fundust í töskum hans. Wow Air flugfélagið flýgur beint á BWI flugvöllinn í Baltimore.

Bandaríska dagblaðið Baltimore Sunfjallar um málið og greinir frá því að manninum hafi verið sleppt að lokinni yfirheyrslu en hvalbeinin hafi verið haldlögð. Bandarísk alríkislög og alþjóðalög banna innflutning beina úr dýrategundum sem eru í útrýmingarhættu. Tollverðir í Baltimore eru að staðreyna hvort beinin séu úr slíkri tegund og ef svo reynist ekki vera fær maðurinn beinin afhent á ný.

Að sögn Gísla Víkingssonar hvalasérfræðings hjá Hafrannsóknarstofnun hafa allar hvalategundir sem heyra undir Alþjóðahvalveiðiráðið verið flokkaðar á lista yfir dýr í útrýmingarhættu. Þar með eru allar hvalategundir í íslensku efnahagslögsögunni á listanum, jafnvel þótt margar þeirra eins og til dæmis hrefna séu í raun ekki í útrýmingarhættu og Íslendingar stundi sjálfbærar veiðar á þeim. Gísli segir því mjög líklegt að umrædd bein séu á lista yfir bein sem óhemilt sé að flytja milli landa. Gísli segir jafnframt að mikil skriffinnska fylgi heimildum um flutning beina sem finnast á víðavangi, til dæmis við strendur.




Fleiri fréttir

Sjá meira


×