Innlent

Fangarnir enn ófundnir

sunna karen sigurþórsdóttir skrifar
Talið er að mennirnir hafi flúið fangelsið rétt fyrir miðnætti í gær.
Talið er að mennirnir hafi flúið fangelsið rétt fyrir miðnætti í gær. vísir/róbert reynisson

Fangarnir tveir sem struku úr fangelsinu að Sogni í gærkvöldi eru enn ófundnir. Leitin er í höndum lögreglunnar á Suðurlandi, en samkvæmt upplýsingum frá henni hefur ekki verið talin þörf á að kalla út frekari mannskap.

Um er að ræða tvo fanga í kringum tvítugt. Þeir voru á sínum tíma dæmdir fyrir minniháttar brot og eru ekki taldir hættulegir. Annar þeirra strauk í fyrra frá Kvíabryggju en fannst skömmu síðar á Þingvöllum þar sem hann var handtekinn.

Fangelsið að Sogni er skilgreint sem opið fangelsi þannig að engar girðingar eða múrar afmarka það. Páll Winkel fangelsismálastjóri sagði í samtali við fréttastofu í morgun að sjaldgæft sé að fangar strjúki úr opnum fangelsum, enda vilji þeir vistast við eins frjálsar aðstæður og hægt sé.

Lögreglan á Suðurlandi segist ekki hafa fengið vísbendingar um ferðir mannanna. Nú séu lögreglumenn á Suðurlandi og á höfuðborgarsvæðinu að leita, en að lögreglan á höfuðborgarsvæðinu taki við rannsókn málsins að sólarhring liðnum, finnist þeir ekki.


Tengdar fréttir

Tveir fangar struku frá Sogni í nótt

Tveir ungir karlmenn struku úr fangelsinu að Sogni i gærkvöldi og ganga enn lausir, eftir því sem fréttastofa veit best. Lögreglan á Suðurlandi segist kannast við málið, en Fangelsismálatofnun hefur ekki leitað eftir aðstoð hennar.



Fleiri fréttir

Sjá meira