Erlent

Stóð af sér vantrauststillögu

Samúel Karl Ólason skrifar
Arseniy Yatsenyuk á þingi í dag.
Arseniy Yatsenyuk á þingi í dag. Vísir/EPA

Ríkisstjórn Arseniy Yatsenyuk stóð í kvöld af sér vantrauststillögu. Fyrr í kvöld hafði Petro Poroshenko, forseti, farið fram á afsögn forsætisráðherrans, sem hefur verið sakaður um spillingu. Einnig hefur honum verið kennt um hægagang endurbóta í Úkraínu.

Poroshenko sagði fyrr í dag að Yatsenyuk hefði tapað trausti þjóðarinnar. Fylgi forsætisráðherrans hefur dalað verulega vegna efnahagsvandræða Úkraínu, samkvæmt frétt BBC. Nýleg könnun gaf í skyn að fylgi flokks forsætisráðherrans væri einungis eitt prósent.

194 þingmenn af 339 studdu vantrauststillöguna. Til þess að hún hefði verið samþykkt hefðu 226 þingmenn að greiða atkvæði með henni.

Sjá einnig: Úkraínuforseti biður forsætisráðherrann um að segja af sér

Áður en atkvæðagreiðslan fór fram sagði Yatsenyuk að ríkisstjórn hans hefði gert sitt besta þrátt fyrir gífurlega erfiðleika.

Alþjóðagjaldeyrissjóðurinn hótaði í síðustu viku að fresta næstu lánagreiðslu upp á um 2.260 milljarða króna þar sem umbætur í landinu hafi gengið hægt og of lítið hafi verið gert í baráttunni gegn spillingu.
 

Í desember reyndi þingmaðurinn Oleg Barna að bera Yatsenyuk úr pontu og til slagsmála kom í þinginu.

Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira