Körfubolti

Annað tap Jóns Arnórs og félaga á Spáni og bikardraumurinn úr sögunni

Tómas Þór Þórðarson skrifar
Svekkjandi fyrir Jón Arnór og félaga hans.
Svekkjandi fyrir Jón Arnór og félaga hans. vísir/valli

Jón Arnór Stefánsson og félagar hans í spænska úrvalsdeildarliðinu Valencia eru úr leik í Konungsbikarnum á Spáni eftir tap á heimavelli í átta liða úrslitum í kvöld, 78-83.

Valencia, sem var aðeins búið að tapa einum leik á Spáni í allan vetur, lá í valnum gegn Gran Canaria sem er í fimmta sæti deildarinnar, sex sigrum á eftir toppliði Valencia.

Leikurinn var hrikalega jafn og spennandi. Staðan var 42-42 í hálfleik, en Jón Arnór og félagar voru komnir með tíu stiga forskot í byrjun fjórða leikhluta, 67-67.

Þá kom áhlaup frá gestunum sem jöfnuðu metin í 69-69 og aftur í 71-71 áður en þeir tóku svo fimm stiga sprett og komust yfir, 76-71.

Gran Canaria náði að halda forskotinu allt til leiksloka og skella toppliðinu í bikarnum og það á útivelli. Svekkjandi fyrir Jón Arnór sem komst í úrslitahelgi spænska bikarsins undanfarin tvö ár með Zaragoza.

Jón Arnór spilaði aðeins fjórar mínútur í kvöld og var stigalaus, en hann tók eitt frákast.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira