Fótbolti

Pochettino: Alli á margt eftir ólært

Ingvi Þór Sæmundsson skrifar
Alli hefur slegið í gegn með Tottenham í vetur.
Alli hefur slegið í gegn með Tottenham í vetur. vísir/getty

Dele Alli var heppinn að fá ekki rauða spjaldið þegar Tottenham sótti Fiorentina heim í fyrri leik liðanna í 32-liða úrslitum Evrópudeildarinnar í gær.

Alli braut á varnarmanninum Nenad Tomovic eftir hálftíma leik og sparkaði svo í Serbann er hann lá á vellinum. Felix Zwayer, dómari leiksins, lyfti bara gula spjaldinu á loft og Alli slapp þar með skrekkinn.

Mauricio Pochettino, knattspyrnustjóri Tottenham, sá atvikið ekki fyrr en á myndbandi en hann kvaðst ætla að eiga orð við Alli um það.

„Við verðum að reyna að leiðbeina honum. Hann er ungur leikmaður og á enn margt ólært um fótbolta á hæsta getustigi,“ sagði Pochettino en Alli er á sínu fyrsta tímabili hjá Tottenham eftir að hafa hafið ferilinn hjá MK Dons í C-deildinni.

„Þetta er fyrsta tímabilið hans með Tottenham í ensku úrvalsdeildinni. Hann kom úr C-deildinni svo hann þarf að læra margt,“ bætti Pochettino við.

Leik Fiorentina og Tottenham lyktaði með 1-1 jafntefli. Nacer Chadli kom Spurs yfir með marki úr vítaspyrnu átta mínútum fyrir hálfleik en Filippo Fernardeschi jafnaði metin í 1-1 á 59. mínútu og þar við sat.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira