Enski boltinn

Stoke City átti stærstu kaupin á síðasta degi gluggans

Óskar Ófeigur Jónsson skrifar
Giannelli Imbula í leik með Porto.
Giannelli Imbula í leik með Porto. Vísir/Getty

Giannelli Imbula varð í dag dýrasti leikmaðurinn í sögu Stoke City eftir að enska úrvalsdeildarfélagið keypti hann á 18,3 milljónir punda frá Porto.

Stoke hafði áður eytt mestu í Svisslendinginn Xherdan Shaqiri sem félagið keypti á 12 milljónir punda frá Internazionale fyrir núverandi tímabil.

Giannelli Imbula er ekki aðeins dýrasti leikmaðurinn í sögu Stoke því ekkert enskt félag eyddi meiru í einn leikmann í þessum félagsskiptaglugga sem lokaði í kvöld.

Giannelli Imbula er 23 ára gamall franskur miðjumaður sem var aðeins hálft tímabil hjá Porto.

Porto keypti hann frá franska félaginu Marseille í júlí en hann hafði spilað með Marseille í tvö tímabil.

„Giannelli er mjög góður ungur leikmaður," sagði Mark Hughes, knattspyrnustjóri Stoke í viðtali á heimasíðu félagsins í kvöld.

„Hann er kraftmikill, góður með boltann og getur gefið langar og góðar sendingar. Það er enginn vafi á því að hann gerir liðið betra," sagði Hughes.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira