Fótbolti

Alfreð kom inn á í tapi Augsburg

Ingvi Þór Sæmundsson skrifar
Alfreð lék síðustu 20 mínúturnar.
Alfreð lék síðustu 20 mínúturnar. mynd/augsburg

Alfreð Finnbogason lék sinn fyrsta leik fyrir Augsburg þegar liðið tapaði 2-1 fyrir Ingolstadt í þýsku úrvalsdeildinni í dag.

Alfreð hóf leikinn á varamannabekknum en kom inn á sem varamaður á 70. mínútu.

Þá var staðan 1-1 en stundarfjórðungi síðar fékk Ingolstadt vítaspyrnu sem Moritz Hartmann skoraði sigurmarkið úr.

Augsburg komst yfir í leiknum með marki Konstantinos Stafylidis á 14. mínútu en Marvin Matip jafnaði metin fyrir Ingolstadt á 59. mínútu.

Augsburg er án sigurs í síðustu þremur leikjum en Alfreð og félagar eru í 13. sæti deildarinnar með 21 stig, tveimur stigum frá fallsæti.

Fjórum öðrum leikjum er lokið í þýsku deildinni í dag.

Stuttgart vann sinn fjórða leik í röð þegar liðið bar sigurorð af Frankfurt, 1-4, á útivelli.

Dortmund gerði aðeins markalaust jafntefli við Hertha Berlin á útivelli en Wolfsburg komst upp í 4. sæti deildarinnar með öruggum 3-0 sigri á Wolfsburg á heimavelli.

Þá vann Mainz 0-1 sigur á Hannover 96.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira