Innlent

Féllu í hálku og runnu niður um 100 metra

Tryggvi Páll Tryggvason skrifar
Þyrla Landhelgisgæslunnar sótti göngufólk sem rann til í hálku og féll niður hlíð í Skarðsdal á Skarðsheiði.
Þyrla Landhelgisgæslunnar sótti göngufólk sem rann til í hálku og féll niður hlíð í Skarðsdal á Skarðsheiði. Vísir

Karl á fimmtugsaldri og kona á sjötugsaldri skrikaði fótur í hálku í um 6-700 metra hæð og runnu þau niður um 100 metra niður hlíð. Þyrla Landhelgisgæslunnar flutti fólkið á Landsspítala í Fossvogi.

Voru þau á göngu með gönguhóp í Skarðsdal á Skarðsheiði fyrr í dag er þau runnu í hálku. Slösuðust þau við fallið og var þyrla Landhelgisgæslunnar ræst út ásamt þrjátíu manna björgunarliði frá Akranesi, Borgarfirði og úr Borgarnesi.

Þyrlan sótti göngufólkið en voru björgunarsveitir ekki komnar á slysstað þegar þyrlan mætti. Greiðlega gekk að búa um hina slösuðu en aðstæður á slysstað voru erfiðar. Var hinum slösuðu flogið með þyrlunni á Landsspítala í Fossvogi þar sem þau hljóta nú aðhlynningu. Verður samferðamönnum hinna slösuðu boðið upp á áfallahjálp.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira