Innlent

Samræmd próf gerð rafræn og færð í níunda bekk

Bjarki Ármannsson skrifar
Samræmd próf í grunnskólum verða lögð fyrir með rafrænum hætti frá og með haustinu 2016.
Samræmd próf í grunnskólum verða lögð fyrir með rafrænum hætti frá og með haustinu 2016. Vísir/Anton

Samræmd próf í grunnskólum verða lögð fyrir með rafrænum hætti frá og með haustinu 2016. Þá verða þau samræmdu próf sem undanfarin ár hafa verið haldin að hausti í tíunda bekk færð til vors í níunda bekk.

Frá þessum breytingum er greint í frétt á vef mennta- og menningarmálaráðuneytisins. Þar segir að breytingarnar byggi á tillögu Menntamálastofnunar, sem muni á næstunni kynna breytt fyrirkomulag samræmdra prófa og greina frá því hvenær þau verði lögð fyrir á næsta skólaári.

Tilfærsla samræmdu prófanna hefur það í för með sér að ekkert próf verður haldið í tíunda bekk næsta haust. Þeir nemendur sem verða í tíunda bekk á næsta skólaári munu í staðinn þreyta próf vorið 2017, á sama tíma og níundu bekkingar.

„Með því að gera prófin rafræn gefst kostur á fjölbreyttari leiðum við að prófa markmið skólastarfs, stytta vinnslutíma miðlægra prófa, bjóða upp á sveigjanleika í fyrirlögn, auðvelda stuðningsúrræði fyrir nemendur með sérþarfir og gefa kost á að laga próffyrirlögn að hæfni nemenda,” segir á vef ráðuneytisins. „Með því að færa tíundu bekkjar könnunarprófið í níunda bekk gefst nemendum, forráðamönnum þeirra og kennurum meira svigrúm til þess að nýta sér niðurstöðurnar til að bregðast við og móta áherslur í námi í tíunda bekk.”

Samhliða þessum breytingum stendur til að gera könnunarprófin hæfnimiðaðri í takt við áherslur í aðalnámskrá grunnskóla frá 2013. Áfram verða tvö könnunarpróf í fjórða og sjöunda bekk, í íslensku og stærðfræði. Í tíunda bekk verður hæfni í íslensku, stærðfræði og ensku metin.


Tengdar fréttir

Hæfnispróf tekin upp í framhaldsskólum

Framhaldsskólum verður ekki heimilt að nýta niðurstöður samræmdra prófa vegna innritunar næsta vor. Í undirbúningi eru viðamiklar breytingar á námsmati í grunnskólum landsins.

Skoða upptöku samræmdra prófa á ný

Menntamálaráðherra kannar sé hvort einkunnaverðbólga eigi sér stað eftir afnám samræmdra prófa. Hugsanlegt að koma á samræmdum prófum í nýrri mynd.

Íhuga inntökupróf í Verzló strax næsta vor

Skólameistari Verzlunarskólans segir nýtt einkunnakerfi sem tók við af samræmdum prófum hafa reynst illa og að alvarlega sé íhugað að taka upp inntökupróf strax næsta vor.



Fleiri fréttir

Sjá meira