Enski boltinn

Howard gæti snúið aftur til Bandaríkjanna eftir tímabilið

Ingvi Þór Sæmundsson skrifar
Howard hefur átt erfitt uppdráttar í vetur.
Howard hefur átt erfitt uppdráttar í vetur. vísir/getty

Bandaríski markvörðurinn Tim Howard gæti verið á heimleið eftir tímabilið. Þetta kemur fram í frétt Daily Mail.

Howard hefur verið í herbúðum Everton frá árinu 2006 og er leikjahæsti leikmaður liðsins í sögu úrvalsdeildarinnar. Howard hefur hins vegar átt erfitt uppdráttar í vetur og svo gæti farið að hann snúi aftur til heimalandsins fyrr en áætlað var.

Hinn 36 ára gamli Howard hefur verið orðaður við lið Colorado Rapids í MLS-deildinni í Bandaríkjunum en Everton gæti leyft honum að fara á frjálsri sölu að tímabilinu loknu, jafnvel þótt samningur hans renni ekki út fyrr en 2018.

Howard er sem stendur meiddur á hné og missti af þeim sökum af deildarleikjunum gegn Newcastle United og Stoke City.

Spánverjinn Joel Robles stóð í marki Everton í þessum leikjum og hélt hreinu í þeim báðum og því er óvíst hvort Roberto Martínez, knattspyrnustjóri Everton, taki Howard beint inn í byrjunarliðið þegar hann kemur aftur eða haldi tryggð við Robles.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira